Atualità
Ai 24 d’agost inauguraziun dla mostra de Brandlechner tl Istitut Ladin
USP – La linia de mostres artistiches da d’isté tl Istitut Ladin se stlüj jö cun i chedri de Davide Brandlechner. En vëndres, ai 24 d’agost gnaràl inaudè dales sis da sëra la cuarta y ultima mostra.
I chedri de Davide Brandlechner mostra, tres formes geometriches y na gran varieté de corusc, na perzeziun intima di posć y dla cultura incër ël ia, cun n'atenziun particolara por i frabicać da paur. Davide Brandlechner (1968) à studié lege al'Université da Desproch. Al vir y laôra a La Pli y se dedichëia te so tëmp lëde al'ert.
Pro l'inauguraziun tl Istitut Ladin a San Martin de Tor podaràn aldì na introduziun ala mostra de Iaco Rigo. Dla cornisc musicala se cruziarà Angela Palfrader y Esther Videsott.
La mostra "corusc" de Davide Brandlechner sarà da odëi ćina ai 3 de setëmber, dales 10 ales 6 da sëra, ti locai dl Istitut Ladin a San Martin de Tor.
Chësta é la cuarta y ultima mostra dl proiet "Mostres 2012" metü a jì dal Istitut Ladin Micurà de Rü y l'assoziaziun di artisć EPL. Ćina śëgn él stè da odëi les mostres de Gerald Moroder de Urtijëi, Gabriele Grones da Reba y Lili Cristofolini d'Al Plan.
"Mostres 2012" tl Istitut Ladin a San Martin
Gerald Moroder | alter ego
13.7. - 23.7.
Gabriele Grones | ichnos
27.7 - 6.8.
Lili Cristofolini | relaziun
10.8. - 20.8.
Davide Brandlechner | corusc
24.8 - 3.9
as
