Atualità
Arpejon dla lijëndes ladines: 21 agost a Urtijëi y 22 agost a Corvara
USP - Per fé cunëscer l drë valor dla lijëndes ladines al mond culturel talian, vëniel dat ora l liber “Miti ladini delle Dolomiti”. Te chësc proiet dl Istitut Ladin Micurà de Rü iel unì scrit da nuef la lijëndes ladines abinedes adum da Karl Felix Wolff per fé valëi si mpurtanza storich-culturela y per de les dé inant te n cuntest de valuta leterera. L liber nuef vën prejentà n merdi 21 de agost a Urtijëi y n mierculdi 22 de agost a Corvara.
La lijëndes dl Rëni de Fanes fova ti prim ani dl secul passà unides tëutes su y publichedes do criteries etnologiches nia for defin drëc. “Karl Felix Wolff à salvà l’ana dla Dolomites. Ël ne à nia nventà la lijëndes ladines, ël les à abinedes y les à scrites ntëur aldò di criteries de si tëmp” spiega la prufessëura Ulrike Kindl. A chësta maniera vën la dimenscion mitologica y storich-culturela dl material defin sotvaluteda. Chësc reverda dantaprima l mont leterer talian.
Ma la populazion ladina à n’arpejon culturel-mitologica de gran valor. Nsci à l autëur Nicola Dal Falco cun l sustëni scientifich dla prufessëura Ulrike Kindl scrit l liber “Miti ladini delle Dolomiti”.
L Istitut Ladin Micurà de Rü prejënta chësc liber nuef n merdi ai 21 de agost tla Cësa de Cultura a Urtijëi y n mierculdi ai 22 de agost tl Salf dles manifestaziuns a Corvara. Tramedoi prejentazions scumëncia dala 17.30.
La prejentazions fej pert dla seria de „Un libro, una montagna - Incontri con l’autore“ metuda a jì dala Asoziazions Turistiches de Urtijëi y Corvara.
I culaburadëures di media ie nviei ala prejentazions y de cunedì i cuntenuc de chësc proiet editoriel.
as
