Atualità
Jonta sburdla per regulamentazion dla graduatories di nsenianc
USP – Nsenianc che ne possa nia ruvé definitivamënter te graduatoria ajache l ti mancia la spezialisazion, possa sën speré. L Stat à dat pro che vënie metui a jì i cursc, tl Südtirol uniral fat n regulamënt spezifich. Sce chësc vën tosc a se l dé se teniran aldò, autramënter zaperà ite la Provinzia.
La lege statela vëija dant che per ruvé definitivamënter te graduatoria, ne adrova nsenianc nia me l studi udù dant, ma nce n curs de spezialisazion. Ma chësc ne pudoven nchinamò nia fé, ajache l Stat ne ova nia dat l’autorisazion. Chësc à danterauter purtà che chiche à studià a Dispruch pudova ruvé te graduatoria, ma nia chiche à fin l studi a Persenon.
Sën à l Stat dat la puscibltà de fé i cursc sun chëi che n aspitova bele da 12 ani. Per i raions de mendranza mancia mo l regulamënt spezifich. “Per chësc vëniel l’ena che vën cherdà ite na mëisa de descuscion” à dit l presidënt Luis Durnwalder. Sce chësta grupa de lëur ruva tosc a na soluzion, la meteran nce n droa tl Südtirol.
Sce la ëssa da se tré ala longes, à la Jonta provinziela bele tëut la dezijion de pië man nstëssa. “Sce l ie debujën, se cruzierons nstësc di 500 nsenianc che spieta sun na pruspetiva plu segura” à dit Durnwalder.
as
