Scora / Cultura | 24.05.2012 | 15:49

Rumantsch Grischun (4): la pratica tla Val Müstair

USP – L entusiasm pionieristich y pona la dificulteies tla pratica à caraterisà l’esperienza cun la rujeneda unificheda tla Val Müstair. L ambolt Arno Lamprecht y presidënt dl cunsëi de scola Reto Rossett à rujenà de si situazion.

Dl 2005 fova la val Müstair stata una dla primes a tò su la rujeneda unificheda te scola, ma pona ne à i autri chemuns nia trat pea ajache manciova la basa giuridica. Ti ani an udù che i sculeies à dificulteies a dé esprescion tres l Rumantsch Grischun. Tla val Müstair vëniel rujenà Jauer y scrit Vallader. N var al iede à la populazion tres referendum tëut la dezijion de jì de reviers a idiom de valeda te scola (cëla l auter articul).

Te chisc ani an nce sentì l mancë de na cumenanza che rejona bele la rujeneda unitera. L Rumantsch Grischon vën me rujenà da vel nsenianc y chi che l adrova per mestier. “La vën sentida sciche rujeneda artifiziela, ajache la vën nsenieda te scola, ma degun ne la rejona” à dit l ambolt Arno Lamprecht. Sce la unissa me nsenieda tant da vester boni dla liejer y ntënder a usc, unissela bën azeteda tla val Müstair. Ma sce la ne vën nia rujeneda, ne se vëijen nia ora pusciblteies realistiches che la possa resté n vita.

Sce un idiom unissa slargià ora a dut l raion dla Rumantscia, fossel na cumenanza che possa l nsenië, ma dal’autra pert fossel dessegur rie arjonjer n’azetanza. Nce i reprejentanc dla val Müstair ie de chëla che la ntroduzion te scola ie jita massa debota y che l fossa debujën de na bona cumbinazion danter la verscion idiomatica y na verscion unitera.

as

Galaria dales fotografies

Dl’esperienza pratica tla Val Müstair à rujenà l ambolt Arno Lamprecht y l presidënt de scola Reto Rossett;