Scora / Cultura | 24.05.2012 | 15:36

Rumantsch Grischun (2): I promotëures dla Lia Rumantscha

USP – La ntroduzion dla rujeneda standard ie nce per i promotëures nstësc dla Lia Rumantscha jita massa debota jan nia streda nia naturela. L Rumantsch Grischun vën purempò azetà a livel sëura la valedes. De bona esperienzes an nce fat tl svilup de paroles nueves.

Te si ntroduzion à l presidënt dla Lia Rumantscha Vincent Augustin spiegà ala delegazion che l Rumantsch standard ie azetà sciche rujeneda aministrativa, tla televijion y radio. I ponc critics ie la rujeneda de alfabestisazion y l finanziamënt di materiai de scola.
L Rumantsch Grischun vën adurvà y azetà a livel de Chantun y Conferderaziun. Chësc uel di de vies di autri Chantuns y danter na valeda y l’autra. I chemuns lëura plu che auter cun si idiom de valeda. “L ie bën vëira che la leges ie scrites tl standard, ma ti i pruzesc vëniel dantaprima rujenà tudësch” à dit Augustin. Radio y Televijion porta la nutizies tl standard, ma la singula trasmiscions ti idioms, y chësc ie generalmënter azetà.
La gaujes che à purtà ala resultat dl referendum tla val Müstair, vën ududes tla massa pitla partezipazion da pert di genitores che à pona abù dificulteies a ti judé ai si mutons. Sun la pert politica ne iel nia unì tenì cont assé dla critiches. A prejenté l‘idea dla rujeneda unificheda se an arjumà de fé capì che l ne se trata nia de na dezijion per un o l auter, ma che la rujeneda standard ie penseda per stizé i idioms. Massa debota iela jita a pruté l Rumantsch Grischun te scola y tlo ëssen messù de pu pëis al aspet rezitiv: al ntënder tl audì y a liejer, y nia tan al scrì o rujené.

La rujeneda possa me se mantenì sce la viv. N cont de paroles nueves che ie debujën ne iel per na pitla grupa de rujeneda nia mesun avëi l finanziamënt y la persones prufescionalmënter cumpetëntes per fé chisc lëures te cin idioms. Nsci iel unì fat n bon lëur cun l Rumantsch Grischun y chësc porta n var al iede a na unificazion.

I reprejentanc dla Lia Rumantscha à sorissà l bujën de tenì cont de dinamiches che possa unì a se l dé te cuestions de rujeneda: emozions y ideologies possa saurì avëi la sëuravënta pra referendums. Dal’autra pert à la descuscion dla rujeneda unificheda purtà a se de ju cun la rujeneda y chësc vën udù de bon uedl n cont dl festide che la rujeneda de mendranza vede do ju.

Nfurmazion dla Lia Rumantscha sun www.liarumantscha.ch

as

Galaria dales fotografies

Ancunteda cun la Lia Rumantscha reprejenteda dal presidënt Vincent Augustin, Urs Cadruvi, Anna-Alice Dazzi, Andreas Gabriel y Martin Mathiuet;