Atualità
A Urtijëi pëia via l proiet "I valores de Gibì y Doppiaw"
OSP - Dai 19 ai 24 de nuvëmber uniral metù a jì a Urtijëi l'ancuntedes de furmazion y la mostra dla figures animedes per mutons "Gibì y Doppiaw".
Ai prim de dezëmber dl 2000 à l'Università de Verona metù a jì l Cunvëni nternaziunel "L auter me cëla y à da nfé cun me. Se tré su se nstës y i autri al altruism". Cun passa mile partezipanc se à l Cunvëni dat ju cun argumënc che à da nfé cun l altruism y cun i valores tl ciamp dl'educazion.Un di mumënc plu mpurtanc dl Cunvëni ie stata la prejentazion dla mostra dla doi figures animedes "Gibì y Doppiaw", che ie unides desseniedes da Walter Kostner che ie nasciù a Urtijëi. I doi paiazi ie unic cris ora dal'Università de Verona sciche ejëmpli de coche n possa cialé sun l auter y dl vester scëmpl y i ie unic premiei ajache i ie 'purtadëures de valores universei' de n diplom dëni de honoris causa. 50 stories de Gibì y Doppiaw ie unides mustredes da RAI 2 y l ie unì dat ora te rujenedes defrëntes sibe i video che la publicazions.
Do l Cunvëni de Verona ie la Mostra de "Gibì y Doppiaw" unida prejenteda te truepa ziteies dla Talia dl Nord. L ie nsci unida a se l dé la pruposta de la purtè te Gherdëina a Urtijëi. Cun l aiut dl Istitut Ladin "Micurà de Rü", dl Istitut Pedagogich Ladin, dl Intendënza Ladina, dl Chemun de Urtijëi y deberieda cun la Sezion de Scienzes dla Furmazion dl'Università de Verona y cun la revista 'il Quaderno Montessori', pëia via l proiet "I valores de Gibí y Doppiaw" che se partësc te doi tapes fundamenteles: n valguna ancuntedes de furmazion per nsenianc y na mostra cun i dessënies dla stories de "Gibì y Doppiaw" acumpanieda y animeda a plu manieres cun dessëni, parola, mujiga, poejia, video, computer, che unirà metuda a jì a Urtijëi. La giaurida dla mostra cun i dessënies dla stories de Gibì y Doppiaw, ie n merdi ai 19 de nuvëmber dala 18 tl Palaz di Cungresc.
L'orar de vijita ie dal mierculdi ala dumënia, dala 9 ala 12 y dala 15 ala 22.
EB
