Scora / Cultura | 10.04.2012 | 15:03

22 milion per l dërt de studium

USP - Danter borses de stude, rembursamënt de iscrizions, lueges da durmì y menses à la Jonta provinziela (NCUEI) ai 10 de auril dat pro finanziamënc per 22 milion de euro acioche la jënt posse chëst ann studië te na università. L fin prinzipel de chisc aiuc ie de premië chëi che arjonj de bon resultac y de judé a chëi che ne à nia nstës la despunibltà finanziera de jì al’università.

Majera pert de chisc scioldi ti va a chiche à n davani sot a 30.000 euro cun detrazions. Per la borses de studi iel udù dant 13,6 milion de euro cun singula borses nchin a 5.800 euro per curì nchin a 70% dl custimënt de stude. Per chiche fej l’università tl Südtirol iel udù dant 633 borses per de ndut 3,67 milion de euro, per chiche studieia ora de provinzia iel 1.658 bores per de ndut 9,6 milion de euro. Leprò ruva mo 399.000 euro (per 344 borses) per meric particuleres y per studënc te de stleta cundizions.

Passa 1,5 milion de euro ie udui dant per rembursamënt de iscrizions y 2 milion per la lueges da durmì. A Bulsan iel 501 lueges da durmì per studënc y a Persenon 115. Tl’Austria iel unì metù a jì cunvenzions cun cëses di studënc per 715 lueges.

Per la menses tl’universiteies a Bulsan (doves) a Burnech y Persenon iel unì dat pro 700.000 euro. N majer finanziamënt, 2,5 milion de euro ie udù dant per la furmazion do la laurea sciche master, spezialisazions, tituli de tueda y pratiches prufesciuneles.

as