Atualità
24 nsenianc ie passei l ejam de ladin
USP – Per pudëi nsenië tla scoles ladines muessen avëi fat n ejam de ladin per nsenianc. Ai 23 de merz ie 24 candidac de Gherdëina y dla Val Badia passei chësc ejam. Ëi possa sën fé dumanda de ruvé tla graduatories di nsenianc dla scoles y scolines ladines.
34 candidac se ova a La Ila prejentà al ejam scrit. Tlo se tratovela de fé na traduzion tl ladin pian via da n test tudësch o talian, aldò dla ulentà di candidac. 25 ie passei chësta prima pert ulache la cumiscion à dat pëis ala coerënza cun l test uriginel, ala regules de grafia, al lessich, la morfologia y la sintassa. Tla scola mesana de La Ila iel nce unì tëut ju l ejam a usc. Te chësta segonda pert dl ejam de ladin i passei 24 candidac. Per la valutazion dla proves de ejam fovel unì numinà na cumiscion de sies persones.
Cun l ejam de ladin vën la stieres da maester tla scolines y scoles ladines resservedes defin a nsenianc de rujeneda ladina. Duc i nsenianc muessa avëi l trilinguism, ma i ladins vën tëui dant.
as
