Atualità
Grafiches de Pitscheider y Polli per libri nueves de leteratura ladina
USP - Isabell Pitscheider de Sëlva y Petra Polli de Sëuc à venciù l cuncors de grafica per l cuiertl de doi libri nueves de leteratura ladina. La grafiches unirà adurvedes per i libri di pec letereres che ova venciù l cuncors “Autëures Ladins Scrij”, scrit ora dal Assessorat provinziel ladin.
Bele l cuncors de leteratura ladina ova cun 53 lëures mandei ite abù n gran suzes de nteres y cualità. Per l cuncors dla grafiches di libri iel unì mandà ite 55 lëures: doi de plu. La se tratova de ti dé n cialé ora al cuiertl de doi libri.
Isabell Pitscheider à cun si fotografia venciù la lerch sun l cuiertl dl liber de stories ladines „Autëures Ladins Scrij...“. L’artista de Sëlva, nasciuda l ann 1969, à tucà na dimenscion che ti à plajù ala giuria. Tla mutivazion vëniel sotrissà che chësta cumposizion spidlea n particuler che devënta n’astrazion de n’idea: i pei che sënia la streda dà l’idea de sëides, de cunfins che ie, ma ne ie nce nia, che n possa spusté o nce mëter da na pert. Tl cuncors de leteratura fovel unì damandà de scrì stories per jëuni che trata de curaje zevil, dl daunì o dla lidëza. Ala giuria ti à particularmënter plajù l‘ idea de cunfins per l daunì, per la lidëza y per l curaje zevil, cunfins che n possa sburdlé y mëter da na pert. La foto ie la visualisazion garateda y atuela dla tematiches dl cuncors.
Tl segondo liber uniral publicà l romann “L fova n iede te Gherdëina. Na saga de cater families tres trëi generazions”. Petra Polli de Sëuc, che vif danter Leipzig y Salzburg à cun na nzijion de ram fat n’opra astrata. Duc i cumëmbri dla giuria ie stai a una de ti dé a chësc lëur l prim pest per via de si cualità artistica. La mutivazion dla valutazion sotrissea l bon livel artistich: “l’artista ie stata bona de tuché l spirt dl liber y dl mëter ju te na forma artistica”.
Petra Polli à nce venciù l segondo pest tla categuria per l auter liber. L segondo pest per l liber dl romann ti ie jit ala grafica de Andreas Trenker de Niederdorf. Ël à fat na eleborazion grafica.
Sëuraprò ala publicazion dla grafiches che à venciù l cuncors, giata i prim plazamënc n pest de 1.000 euro. I segondi possa se crì ora trëi libri tl Ufize dla Cultura Ladina.
Per l cuncors de grafica iel unì mandà ite lëures fai cun tecniches drët desvalives che va dal digital al analogh y nce cun tecniches mescededes. „L ne à nia me fat pea artisć ladins, ma nce dl’autra grupes de rujeneda. Chësc dà esprescion a na dimenscion interculturela de valor per l cuntat cun l’autra grupes de rujeneda“ sorissea l assessëur Florian Mussner. La grafiches ie unides mandedes ite da luesc ladins, tudësc y taliani te cumpëides drët valives. Un n lëur ie nchinamei ruvà da Napoli.
La valutazions di 53 pec letereres y dla 55 grafiches per l cuncors „Autëures Ladins Scrij 2011” ie unides fates da Marco Forni (presidënt de cumiscion) deberieda cun Roberta Dapunt, Isabella Ties, Claus Vittur y Margherita Senoner. L lëur de secretera se à sëurantëut Barbara Perathoner dl Ufize provinziel per la Cultura ladina.
---
D'autri comunicac stampa sun chësc argumënt
09.01.2012 - Mo diesc dis per l cuncors dl cuiertl de libri ladins
15.11.2011 - Cuncors per l cuiertl di libri nueves de leteratura ladina
27.09.2011 - Prim pest dl cuncors de leteratura ladina a Tobia Moroder
24.02.2011 - Nuef cuncors de leteratura ladina: sustëni ala rujeneda
03.05.2011 - Ultima cater enes per mandé ite pec de leteratura ladina
16.05.2011 - 31 de mei: ultimo di per l cuncors de leteratura ladina cun publicazion
as
Galaria dales fotografies
