Atualità
Mo diesc dis per l cuncors dl cuiertl de libri ladins
USP – Nchin ai 20 de jené possen mo dé jù prupostes per l cuiertl de doi libri nueves de leteratura ladina. Per chësta segonda pert dl cuncors “Autëures Ladins Scrij”, scrit ora dal Assessorat provinziel ladin, ie da vëncer de ndut 2.000 euro y de plu libri da crì ora.
La terza edizion dl cuncors de leteratura ladina à abù l gran suzes de 53 lëures mandei ite. Sëuraprò ai lëures valutei per l cuncors à la giuria nce ulù recunëscer l valor de n roman che ie unì mandà ite y a chësta maniera iel unì a se l dé che chëst ann uniral dat ora doi libri nueves de stories scrites per ladin.
La segonda pert dl cuncors reverda l cuiertl de chisc doi libri. La Repartizion Cultura y Ntendënza ladina ti dà la puscibltà a duc sëura i 14 ani de mandé ite si prupostes. L vën azetà duta la esprescions artistiches, la tecnica ie nfati liedia, a cundizion che l lëur muessa vester adatà per la stampa.
L prim pest per l cuiertl de uni liber ie de 1.000 euro, l segondo pest (per uni liber) ie trëi libri da pudëi crì ora tl Ufize Cultura y Scola ladina.
Per l cuiertl dl liber sun la stories premiedes dal cuncors vëniel damandà na nterpretazion liedia de una o de plu dla tematiches dl cuncors: l curaje zevil, l daunì, la lidëza. L cuiertl dl liber dl romann “L fova n iede te Gherdëina” vën damandà do ispirazion al test de ntroduzion.
I lëures possa unì dai ju nchin al plu tert ai 20 de jené 2012 tl Ufize Cultura ladina, streda Binder 29, 39100 Bulsan. I lëures possa nce unì mandei per posta.
Uni partezipant y uni partezipanta possa dé ju al plu doi lëures (un per publicazion). I lëures dëssa vester uriginei y ne dëssa nia bele vester publichei. Uni lëur dëssa vester anunim.
La medema giuria dla prima pert dl cuncors “Autëures ladins Scrij 2011” fajerà nce la valutazion di cuiertli di libri.
La bandida dl cuncors y nfurmazions sëuraprò giaten tl secretariat de cuncors Ufize Cultura ladina Bulsan (tel. 0471/41 70 21, e-mail: Barbara.Perathoner@provinz.bz.it) y sot a www.provinzia.bz.it/leteratura tl web.
---
Comunicat stampa sun i resultac dl cuncors de leteratura: Prim pest dl cuncors de leteratura ladina a Tobia Moroder
Test de ntroduzion dl romann
“L fova n iede te Gherdëina - Na saga de cater families tres trëi generazions”.
L jëunn Artur viv di per di zënza avëi la ideies tleres n cont de cie che l ulerà fé te si daunì. Dut chësc se muda canche l vën, zënza ulëi, trat ite tla storia de si antenac che ne fova nia tan rëidla coche n ëssa pudù miné. La fusties dl’opzion, l boom economich di ani ‘70, l bënsté di ani ‘90 y la melsegurëza dl milené nuef, se mescederà te n iede cun na storia criminela plëina de misteres.
L sarà de bujën de dut l curaje zevil de Artur per nderzé si lën de descendënza. Sambën ne saral nia l sëul, ajache uniun à si destin, ma nce si respunsabltà.
as
