Atualità
Rifesser n pension: prim y ultimo diretëur dl Istitut Pedagogich Ladin
USP – Cun la fin dl ann va Theodor Rifesser, l diretëur dl Servisc de Inovazion y consulënza dla Scola Ladina (ex-Istitut Pedagogich Ladin) n pension. La direzion de chësc Servisc passerà cun jené 2012 al ntendënt dla Scola Ladina. L’assessëur provinziel ladin lauda Rifesser per si atività pionieristica sciche prim y ultimo diretëur dl Istitut che à pità material didatich y furmazion ai nsenianc dla scoles ladines.
Te 22 ani de atività à Theodor Rifesser y si culaburadëures dl Istitut Pedagogich ladin fat n lëur plutosc pioniristich anjenian material per l nseniamënt tla scoles ladines. “Tl prim tëmp nes stajova a cuer de pité i libri de scola per ladin al medemo livel dl’autra rujenedes n cont de cuntenut y forma” se lecorda Rifesser. Ultimamënter an pona dat n majer pëis al material didatich te de plu rujenedes tenian cont dla didatica ntegreda. Aldò de chësta maniera de nseniamënt vëniel adurvà duta nosta rujenedes judan i sculeies a se nuzé de de plu rujenedes zënza fé confujion. “Passa 100 libri de scola per ladin desmostra che Rifesser à te chisc ani menà l Istitut Pedagogich cun suzes te duta si ativiteies. Si mpëni y si savëi pedagogich ie jit a bën de duc i sculeies dla scoles ladines tl’ultima generazion y nce ti ani che à da unì” lauda l assessëur Florian Mussner.
Sëuraprò al material didatich à l Istitut Pedagogich Ladin (IPL) pità truepa furmazion acioche i nsenianc dla scoles ladines tënie l var di tëmps. Ai 15 de mei 1989 ova Theodor Rifesser scumencià sciche prim diretëur dl IPL. Avisa dan n ann, ai prim de jené 2011 ie l Istitut Pedagogich unì ntegrà tla Ntendënza scolastica Ladina giapan l inuem “Ciamp per Inovazion y Consulënza”. Sota la direzion dl ntendënt Roland Verra jirà l’atività inant nce tl ann nuef. Danter i proiec che ie mo tl lëur, nunzieia Rifesser la lingia de libri dla gramatica paredleda. “Nchinamò iel unit ora doi de 5-6 libri. Chësc proiet ie dassënn de utl ajache l pieta la fundamënta per lauré aldò dla didatica ntegreda” dij Rifesser.
Canche l fova unì metù su la Repartizion ladina dl’università de Bulsan fova Theodor Rifesser unì numinà coordinadëur. Chësta ncëria dl ann 1997 al ënghe dat ju, scebën che l tenirà mo lezions y juderà pea a mëter a jì la furmazion per i nsenianc dla scoles ladines.
Rifesser ie te si ncëries daniëura stat l prim, fajan atività pioniristica. Dl 1978 fovel deventà un di prim 5 piscologs scolastics dl Südtirol. Si raion jiva dal Salurn nchin tla val Badia. Dl 1983 canche l fova unì metù su i zëntri soziei fovel deventà diretëur per l raion Bulsan y ntëurvia. Tlo fovel restà nchin a deventé diretëur dl Istitut Pedagogich, l ann 1989.
as
