Atualità
Junta provinziala en prinzip por l’edema de scora da 5 dis
USP - Scomenciamënt dl ann scolastich antizipé y fin spostada, edema da cin dis por scolines y scores elementares, da arlungé a sis dis por scores mesanes y altes. Chësta é la pert zentrala dl’acordanza de mascima, che n’é niaciamò definitiva, arjunta tla Junta provinziala sön le calënder scolastich. "Ara se trata de n’intenüda che garantësc sides l’autonomia scolastica che l’armonisaziun dl calënder" à dit le Presidënt dla Provinzia Luis Durnwalder.
Na lungia descusciun tla Junta provinziala sön le calënder scolastich, argomënt sön chël che al é gnü fat ti ultimi mëisc de gran descusciuns cun posiziuns inće desfarëntes danter le monn linguistich todësch y chël talian. Al momënt él tla provinzia de Balsan n sistem moscedè, olache i singui istituć à na gran autonomia. An va dal’edema cörta da 5 dis de scora, a chëra lungia da 6 dis, passan por les sabedes alternades: n’edema scora, y n’edema no. "I aratun che al vais debojëgn de na majera armonisaziun dl calënder - à splighé Durnwalder – mo ciafè na soluziun che pois ti jì bun a düć, o damì, a insegnanć, scolars y geniturs, n’é daldöt nia saurì". Ala fin àn ciafè tla Junta provinziala n’acordanza de mascima che gnarà ratificada de jenà "por lascè che an mëtes man adora assà cun i laûrs de preparaziun por l’ann nü“ à ajuntè le Presidënt dla Provinzia.
Tl Südtirol metarà man tl dagnì les leziun n’edema denant de setëmber y ares se rovarà n’edema dedô de jügn, tignon cunt di ejams. "Sön chësc argomënt é düć a öna - à sotrissé Luis Durnwalder – ajache sce an va da 34 a 36 edemes de leziun vara da gestì l’orar a na manira plü flessibla". A öna düć trëi i grups linguistics sön l'oportunité de fissé l’edema da 5 dis por scolines y scores elementares, compromis plü ri por les scores mesanes y altes. "La basa - à splighé le Presidënt dla Provinzia - sarà l’edema da 5 dis, deperpo che al toma la poscibilité dl sistem moscedè cun l'alternanza dles sabedes".
Concretamënter: tru lëde por les scores todësces al’edema cörta tles mesanes, deperpo che les scores mesanes y altes talianes, y les scores altes todësces, arà a desposiziun n'opziun implü. "Sce i trëi cherć dl consëi dl raiun scolastich é por l’edema lungia - à dit Durnwalder – podarà les leziuns gnì partides sö sön 6 dis impede sön 5. Ara se trata de na dezijiun che ne n’é nia ćiamò definitiva, sön chëra che i assessurs competënć baiarà ćiamò cun les perts interessades, mo ai arata che na soluziun de chësta sort pois garantì sides l'autonomia scolastica che l'armonisaziun dl calënder".usp
