Atualità
Lege per lerneri unirà adateda dala Jonta provinziela
USP – De lugio à l Guviern a Roma adatà l furmazion di lerneri tres n decret che ie ie jit n dorva de utober. Nchin de auril muessa la Jonta provinziela adaté l regulamënt provinziel ala normatives stateles per nia messëi sëurantò de plën la normes stateles ueves.
L model de furmazion prufesciunel a doi pertes, tres moster y tres scola prufesciunela che ie unì sëurantëut dal raion tudësch y vën bele giut pratigà tl Südtirol ie śën deventà realtà te duta la Talia. La regulamentazion nueva a livel naziunel cumporta nce nuviteies per Südtirol, nsci che la lege provinziela muessa unì adateda. L assessëura Kasslatter Mur à (NCUEI) ai 28 de nuvëmber nfurmà la Jonta provinziela n cont di prim ponc critics. La se trata dantaprima de tan giut che dura l tëmp da lerner y l’età mascima.
“De majera mpurtanza iel de garantì la furmazion di lerneri, che i jëuni posse mparé truep y che i ne vënie nia sfrutei sciche lauranc da bon marcià” à dit l presidënt dla Provinzia. Nsci iel debujën de mëter dant tan giut che possa duré l tëmp da lerner. A livel naziunel iel udù dant trëi ani, tlo da nëus muessel unì deferënzià ajache te vel mestieres iel nce debujën de cater ani.
N segondo pont critich ie l’età mascima di lerneri, che ie tla Talia de 18 ani. Chiche à bele abù 18 ani ne possa nia plu fé n cuntrat da lerner. Tl Südtirol uelen udëi dant trëi livei. Un tl cheder dla scola de ublianza, n segondo per chiche à fat na matura y n terzo livel per chiche à fat n studi. Aldò de livel dëssel pona nce unì metù n’età mascima per i lerneri ruvan nchin al plu a 29 ani.
as
