Atualità
Lia da Mont y jì a crëp: ai 17 de nuvëmber prejentazion tla Teßmann
USP – „Berg Heil! Alpenverein und Bergsteigen von 1918-1945“ se tlama l liber che unirà prejentà ai 17 de nuvëmber a Bulsan. La Biblioteca provinziela Friedrich Teßmann y l Alpenverein Südtirol nvieia ala prejentazion che scumëncia dala ot da sëira.
L salut alpin „Berg Heil!“ ie l titul de n liber nuef che conta dla truepa mplicazions dl’arpizeda: L se trata dl raport danter n’atività ala semea apolitica y l liam strënt danter politica y sozietà. Na grupa de lëur de storics, etnologs y pedagogs à studià avisa y elaburà scientificamënter l tëmp danter la fin dla Gran Viera y la fin dla Segonda Viera Mundiela.
Tl zënter iel la storia de arpizadëures, de apasciunei dl’arpizeda y de cumëmbri dl Alpenverein. La montes y i crëps vën scuvierc coche travert de viac y l’arpizeda se svilupea te n’atività sportiva de massa.
Na pert dl liber trata nce la storia politica dl Alpenverein y si posizion particulera coche lia che jiva sëura i cunfins ora ti Paejes Tudësc, tl’Austria y tl Südtirol. Al Südtirol ti iel unit dedicà na sezion a pert. La tematiches tratedes te chësta sezion ie la pruibizion dl Alpenverein tl scumenciamënt di ani 20, l pierder dla uties da mont, l mené inant l lëur dla lia “a scundon“ y la storia dl sport dl’arpizeda tl cheder dla situazion politica zariëusa.
Oradechël prejentea l liber na lingia d’ativiteies dl Alpenverein che ne à nchin al didancuei nia perdù si mpurtanza: la scunanza dla natura, la spedizions, la nrescida scientifica y l’educazion.
L liber „Berg Heil! Alpenverein und Bergsteigen von 1918-1945“, ie unì dat ora dal Deutscher Alpenverein, Österreichischer Alpenverein y dal Alpenverein Südtirol. La prejentazion dl liber unirà fata da Hans Heiss (acumpaniamënt scientifich) y Florian Trojer (dl Alpenverein Südtirol y coautor dl liber). Danora rujenerà Angelika Gasser, diretëura dl Ufize per la Cultura, Georg Simeoni presidënt dl Alpenverein Südtirol y reprejentanc dla lies alpines di Paejes Tudësc y dl’Austria.
La prejentazion dl liber, ai 17 de nuvëmber 2011, scumëncia dala 20.00 tla Biblioteca provinziela Friedrich Teßmann, Streda A.-Diaz 8, a Bulsan.
usp
