Atualità
Referac' tla Tessmann: „Südtirol tl’Europa. Na chirida de fostüs“
USP - Ai 10 de novëmber scomëncia tla Biblioteca provinziala Teßmann a Balsan na ligna de referac' dedicà al motif prinzipal „Südtirol tl’Europa. Na chirida de fostüs”. La ligna de referac' gnarà daurida dal storiograf Georg Mühlberger y dala storica d’ert Marion Piffer Damiani.
Südtirol tl’Europa, chësta formula conesciüda tol ite n cërtl ampl pian ia da n passè te n stat multinazional dla monarchia di Habsburger rovan ćina tl presënt te n’Europa dles regiuns. I referać dla sëra de daurida tratarà di raporć europeics tl ćiamp dla cultura y dl’ert.
Georg Mühlberger baiarà dl tema „Als Europa zu Fuß ging. Streiflichter entlang früher Spuren europäischer Mobilität in Südtirol“(„Canche l’Europa jô a pé. Strisciores de löm sön i fostüs da dandaìa de mobilité europeica tl Südtirol“).
Danter la costruziun dles strades militares romanes y la realisaziun dles strades por turisć é tröpes porsones passades por trusc sura la ćiadëna dles Alpes. Le raiun dl Südtirol é deventè por süa posiziun geografica spetatur dl movimënt europeich danter nord y süd; chësc forma dantadöt tl’eté medievala na basa importanta por l’intreciamënt y les fondamëntes dl svilup dl’Europa. Le referat é na reflesciun sön le fat de tan inant che chësc toca inće la storia y la cultura medievala tl Südtirol.
Marion Piffer Damiani analisëia te süa relaziun „Kunst in Südtirol. Lokale Motive, europäische Moderne und globale Zeitgenossenschaft“ („L’ert tl Südtirol. Motifs locai, tëmp modern europeich y contemporaneité globala“) l’ert tl Südtirol do le 1950.
I tòć de cronica sön l’ert dl Südtirol do le 1950 fej na schiza de motifs locai, coliamënć europeics y contemporaneité globala. Tl ressümé cört vëgnel a löm tl ćiamp de tenjiun danter local y global punć d’incuntada dla storia dl’ert europeica dl presënt, sciöche inće particolaritês y punć de rotöra regionai y sambëgn inće l’internazionalisaziun cherscënta dl discurs sön l’ert. N aspet important dla discusciun sön l’ert d’al dedaincö é inće chilò la domanda sön la faziun, atualmënter tematisada dassënn, dla globalisaziun sön l’ert, le sistem artistich y la storia dl’ert.
I referać ai 10 de novëmber tla Biblioteca provinziala Friedrich Teßmann, (strada A.-Diaz 8, Balsan) mët man dales 20.00.
usp
