Atualità
Art Day ai 06 de utober a Urtijëi per sustenì la creatività di sculeies
USP – I sculeies de duta la scoles autes ladines fajerà n juebia ai 06 de utober n di de workshops creatives- artistics. Chësc di dl’ert che vën tenì a livel naziunel y vën a Urtijëi metù a jì dala Ntendënza Ladina, ie chëst ann dedicà ala mpurtanza dla detlarazion de grupa de rujeneda pra la Cumpededa dla jënt.
Feter 500 sculées y sculeies puderà tl zënter dla scoles autes a Urtijëi fé pea pra 29 grupes de lëur coordinedes da esperc. L unirà pità d’uni sort de ativiteies creatives y artistiches che va dal balé ala coreografia, dessenië, depënjer o ziplé nchin al fé mujiga y teater. Danter la truepa pusciblteies de workshop artistiches iel nce fotografia, video, comics o scrì creatif.
L ArtDay ie na azion che vën tenida danter scoles autes y prufesciuneles per valorisé l potenzial creatif di jëuni. “Purton inant la terza edizion dl ArtDay per ti dé lerch al spirt artistich te nosta scoles” spiega l ntendënt Roland Verra.
N ucajion dla cumpededa dla jënt 2011 iel unì nvià duta la sculées y sculeies dla scoles autes de Gherdëina y dla Val Badia per dé nce lerch ala campagna „Sambën ladin/a“. A chësta maniera uelen sensibilisé per la detlarazion ala grupa ladina y nce per la simpatia ala dimenscion culturela ladina da pert di studënc dl' autra grupes de rujeneda.
L Art Day ie na ucajion de ancunteda danter duta la sculées y i sculeies, perchël unirà la grupes nce mescededes danter la scoles. L fin de chësta scumenciadiva ie nce de pité na bela esperienza deberieda aldò dla pedagogia dl fé y dl’ancunteda.
Tl cheder dla manifestazion uniral nce prejentà y sëurandat ala scoles l liber “Ancuntedes/Incuntades” dl Ntendënt Roland Verra, che possa unì adurvà per l nseniamënt dla leteratura ladina tla scoles autes.
Program dl Art Day ai 06 de utober
9.00 ancunteda sun la plaza danter la scoles
saluc dla autoriteies
prejentazion dl liber “Ancuntedes-Incuntades”
daldò mët man i workshops
13.00 fin dla manifestazion
---
Culaburadëures di media ie nvei
ai 6 de utober 2011, dala 9.00 ala 13.00
tl zënter dla scoles autes a Urtijëi
y de fé al savëi i cuntenuc de chësta azion.
as
