Atualità
Ai 9 de setëmber “Di dla Scola Ladina”
USP - La nuviteies dl ann de scola nuef y l valor dla mujiga tl’educazion sarà chëst ann i argumënc zentrei tl Di dla Scola Ladina ai 9 de setëmber tl’università a Persenon. Danora prejenterà presidënt dla Provinzia, l assessëur ladin y l ntendënt ladin la nuviteies aministratives. Dopro saral da audì n referat sun l valor dla mujiga tl’educazion.
Nsenianc de scola, reprejentanc di genitores y aministradëures publics ie nviei a se tò dl’aurela n danmesdì per se de ju cun l ann de scola nuef. L presidënt dla Provinzia Luis Durnwalder, l assessëur Florian Mussner y l ntendënt Roland Verra rujenerà dla nuviteies ududes dant dala Jonta provinziela, la fazion dla cumpededa dla jënt sun la scola ladina, i mudamënc de carater pedagogich y la reforma dla scoles autes che va n drova chëst ann.
Tla segonda pert dl Di dla Scola Ladina sarà l digan dla Facultà dla Scienzes dla Furmazion Franz Comploj a purté dant n referat sun l valor dla mujiga tl’educazion. Per chësta rejon iel chëst ann nce unì nvià i nsenianc dla scoles de mujiga tla valedes ladines. La scoles de mujiga dëssa n auter ann unì ntegredes tl'aministrazion di departimënc de educazion. “Sëuraprò al carater nfurmatif, pieta chësc di nce ucajion de ancunteda danter i nsenianc dla doi valedes ladines de nosta provinzia” spiega l ntendënt ladin.
Culaburadëures di media ie nviei
n vënderdi ai 9 de setëmber 2011, dala 8.30
tl’aula magna dl’università a Persenon,
Facultà de Scienzes dla Frumazion
y de cunedì i cuntenuc de chësc di.
as
