Atualità
Te n mëns, l Di dla Cultura Ladina
USP - Ncuei te n mëns, ai 30 de setëmber uniral tenì l Di dla Cultura Ladina. L’edizion da chëst ann pieta ucajion de se dé ju cun la fazion dla cumpededa dla jënt da una pert y mët dal’autra pert l pruporz sun mëisa de descuscion. L Di dla Cultura Ladina unirà chëst ann tenì tl palaz Widmann a Bulsan.
Deberieda cun esperc cialeran ai 30 de setëmber ala spartizion de stieres, cuatieres y mesuns per la grupes de rujeneda te na pruspetiva dl daunì che tën cont dla situazions nueves de families plurilinguistiches y dl’imigrazion de chisc tëmps.
L Di dla Cultura Ladina ne ie nia me pensà per la populazion ladina ma nce per i nteressei dl’autra doi grupes de rujeneda te nosta provinzia. Perchël iel nce prugramà na traduzion simultanea. L program cun referac y descuscion scumencerà dala 9.00 da duman y jirà inant nchin da mesdì. La giaurida unirà tenida dal presidënt dla Provinzia Luis Durnwalder y dal assessëur ladin Florian Mussner.
La cumpededa dla jënt cun la detlarazion de grupa de rujeneda dà uni 10 ani la fundamënta per la spartizion de stieres publiches, cuatieres soziei y l finanziamënt publich de educazion y cultura. Chësc sistem de spartizion n proporzion ala grandëza dla grupes de rujeneda ie cunesciù sciche pruporz. Chëst ann de utober uniral inò fat la cumpededa dla jënt.
as
