Atualità
Prim de juni: prejentazion dl’analisa linguistica tla scoles autes ladines
USP - Per museré la cumpetënza dla rujenedes tla scoles ladines à l Cumité per l’Evaluazion nvià via n’analisa sun basa scientifica. I resultac sun la cumpetënza dl tudësch, talian y ladin di sculeies dla scoles autes unirà prejentei n mierculdi ai prim de juni tl’Università a Persenon. Ala prejentazion cun i prufessëures Rita Franceschini y Pasquale Della Rosa ie nviei duc i nteressei.
La realtà economica y soziela te nosta valedes se damanda for de plu de bona cumpetënzes de esprescion. L Cumité per l’Evaluazion dla Scoles ladins se à perchël tëut su de analisé la cumpetënzes di sculeies tla rujenedes. “Chësc uel di scrì drët, liejer zënza falé y scuté su, ma dantaldut nce avëi na sensibltà per d’autra cultures y minonghes” sorissea Rosmarie Mussner, cuordinadëssa dl’analisa. A livel de scola cumporta la cunescënzes dla rujeneda nce na fundamënta zentrela per capì y mparé l’autra materies.
D’autonn ova sculeies dla cuinta tlasses di istituc tecnics a Urtijëi y La Ila scrit n tema che ie unì analisà dal pont de ududa linguistich. I scric per talian ie unic paredlei cun chëi de sculeies de rujeneda dl’oma taliana tla scola “Battisti” a Bulsan. L medemo iel unì fat cun i temesc tudësc, paredlei cun chëi scric tla scola auta “Kunter” a Bulsan. Cun la culaburazion scientifica de prufessëures dl’Università de Bulsan y dl’Università Vita-Salute San Raffaele de Milan iel de ndut unì analisà 160 scric tla trëi rujenedes.
I resultac sun la cumpetënza tla rujenedes unirà prejentei n mierculdi ai prim de juni 2011 dala 15.00 tl’Università a Persenon (sala 1.50).
I resultac dl’analisa unirà prejentei dala prufessëura Rita Franceschini, diretëura dl zënter de cumpetënza de rujenedes dl Univesità de Bulsan y dal prufessëur Pasquale Della Rosa dl’Università Vita-Salute San Raffaele de Milan. Ala prejentazion tulerà nce pert dl Ntendënt dla Scoles Ladines Roland Verra y l presidënt dl Cumité per l’Evaluazion Lois Ellecosta.
Ala prejentazion ie nviei i respunsabli dl’aministrazions publiches, culaburadëures tla scoles ladines y duc i nteressei.
I culaburadëures di media ie paticularmënter nviei ala prejentazion y de cunedì i resultac.
as
