Atualità
Mantenì la stieres tla scoles ladines nce cun de pitla tlasses
USP – Tla Talia vëniel tëut demez 19.700 stieres de nsenianc ajache l mancia l finanziamënt publich. Te Südtirol iel stat mesun mantenì 7.996 stieres per l nseniamënt tla scoles elementeres, mesanes y autes, zënza scurté stieres. Tla valedes ladines ulache l ie de pitla scoles, iel per i proscimi trëi ani de scola unì garantì la cumpëida de nsenianc per pudëi pité l nseniamënt te tlasses nce cun manco sculeies.
Contra la tendënza a livel de Stat, à la Jonta provinziela segurà la cumpëida de nsenianc zënza scurté stieres. Tla scoles ladines iel per i proscimi trëi ani de scola unì mantenì 326 stieres. Tl ann 2002/03 fovel 303,5 stieres, trëi ani do fovel unì auzà a 305,75 stieres y pona ti ani do oven mo n iede auzà de passa 20 stieres ruvan ala cumpëida de 326. Chësta cumpëida ie unida garantida nchin tl ann de scola 2013/14.
Tla scoles elementeres y mesanes depënd la cumpëida de sculeies dala situazion demografica. Te pitli luesc dla Val Badia iel tl’elementera na media cun manco de 9 sculeies per tlas. “Pudëi garantì l nseniamënt cun tan de pitla tlasses ie bën na situazion unica a livel talian” sorissea l assessëur Florian Mussner. Te duta la scoles elementeres ladines iel unì dat pro nsenianc per arjonjer na media de 13 sculeies per tlas. Tla elementeres tudësces l 14,5 y tla talianes 17.
La cumpëides de sculeies y nsenianc possa plu saurì mudé tla scoles autes ajache i sculeies possa tlo nstës crì ora la scola. Cun la reforma dla scoles autes che unirà metuda n drova de setëmber, iel chëst ann nce unì a se l dé majera mudazions. A Türesc (Sand in Taufes) ne iel nia unì arjont assé iscrizions per pité l Istitut tecnich economich per l turism y a Maran ne iel nia assé sculeies per l gymnasium tlassich.
Tla scoles autes ladines se à n generel mantenì la cumpëides, cun n fruz de manco sculeies tla prima tlasses y 7,8% de plu sculeies de ndut. Te una scola auta, per ejëmpl, vëniel garantì la cumpëida de nsenianc nce sce la media de sculeies sarà me danter 13 y 16,6 per tlas. Tla scoles autes ladines iel n generel na media de 15 sculeies per tlas. Tla scoles autes tudësces ne n iel 19 y tla talianes 18.
“Canche l ie me na pitla cumpëida de iscrizions pro sezion de scola iel damat rie mëter a jì la ressorses per pudëi pité l nseniamënt. Tres modiei nueves de urganisazion nterna saral mpo mesun garantì che la sezions ududes dant dala reforma dla scola auta tla Val Badia y te Gherdëina vënie garantides” spiega l diretëur de repartizion Alexander Prinoth.
as
