Atualità
Metodologies dla scola ladina ti dà crëta a vijitadëures nternaziunei
USP – La vijita ala scoles ladines da pert de na grupa nternaziunela tl ciamp dla furmazion ti à dat gran crëta per realisé l’inuvazion tla furmazion de sculeies cun handicap scrita dant dala Union Europa. Ntan ancuntedes a Sarns y vijites a scoles de Urtijëi iel unì prejentà a esperc da cin nazions doi ponc stersc dla scola ladina, la metodologies de ntegrazion y l nseniamënt dla rujenedes.
Cun l mira de baraté esperienzes sun metodologies dl mparé se ova bele dl 2009 metù adum na grupa de esperc dla furmazion dala cin nazions Deutschland, Austria, Romania, Ungaria y la Talia. De merz se ova chësta grupa ancuntà tla Romania per mparé à cunëscer metodologies de ntegrazion europea de mendranzes etniches. Dan Pasca ie pona la grupa unida tl Südtirol per mparé a cunëscer metodologies y bona pratiches dla scoles ladines.
Canche la se trata de ntegrazion de persones cun handicap à la scola ladina veramënter da mustré su de bona esperienzes. Nsci iel unì prejentà ala grupa nternaziunela l proiet “Se n sté bën a scola” che trata de cumpetënzes sozieles – emoziuneles y de cumpetënzes de comunicazion. Chësta atività à doi ponc zentrei, la ntegrazion de sculeies cun handicap y de sculeies de families migrantes. Tl’ancuntedes che ie unides tenides a Sarns iel danterauter nce unì mustrà na documentazion video de cursc de rujeneda per migranc che ie unic tenì d’instà tla scolina a Urtijëi. Cun chësc ejëmpl an pudù mustré su esperienzes de didatica ntegreda dla rujenedes.
Davia che la Union Europea à scrì dant la inclusion de sculeies cun handicap tl medem sistem scolastich, iel danter i respunsabli dla scoles di autri paejes festide sun l mëter n pratica de chësta diretiva nueva. “Do che on pudù mustré co che la va te nosta scoles dala scolina ala scola auta, à i coleghes dl’autra nazions giapà gran crëta te nosta metodologies” conta Carla Comploj dl servisc de ntegrazion.
Dut l sistem scolastich ladin cun la particularità dl nseniamënt de de plu rujenedes ie unì prejentà dal ntendënt Roland Verra. Ntan i trëi dis de vijites y ancunteda à dut l team dla ntegrazion cun Irene Costa, Sabine Hofer, Lois Castlunger y Eveline Vinatzer pudù spieghe y respuender ala dumandes di coleghes da oradecà.
Do la vijites ala scoles ladines ruva l proiet nternaziunel de barat de metodologies tl mparé te si ultima fasa. Ala fin de mei uniral tenì l’ultima ancunteda a Budapest ulache la se traterà de identità y defrënzes. Ntan duta l’ancuntedes te cin nazions iel for inò unì analisà la bona pratiches prejentedes y tl’ultima ancunteda uniral pona trat adum l’evaluazion de dut l proiet. Da pert dla grupa de ntegrazion dla scola ladina an pudù mparé a cunëscer problems y soluzions de autra realiteies. Ala grupa à la scola ladina dantaldut dat la crëta te metodologies inuvatives tla ntegrazion y nseniamënt de rujenedes te raions ulache l vif de plu grupes de rujeneda.
as
Galaria dales fotografies
