Atualità
Cun “Ena dla cultura” per sustenì la candidatura per la capitela europea 2019
USP – Da n sada ai 9 nchin dumënia ai 17 de auril vëniel a livel talian tenì l’ena dla cultura. Passa 2500 istituzions pieta ntan chëst’ena ntredes debant. Vel scumenciadives unirà nce pitedes tla provinzia de Bulsan. “Jan de viers dla capitela europea dla cultura 2019, ie chësta manifestazion na bona ucajion per mustré su la cultura” dij l’assessëur provinziel Tommasini che à nvià via la candidatura.
2580 mostres, vijites spezieles, cunferënzes, cunvënies y prupostes didatiches – dut cun ntreda debant – tira te duta la Talia l nteres sun la cultura. Nce l Südtirol fej pea a chësta scumenciadiva cun de plu prupostes che zënza. Sëuraprò a cunvënies y cunzerc, vëniel te vel museums nce pità la ntreda debant. Tl Ciastel Tirol vëniel pità na mostra de dëssenies, tl Museion a Bulsan vëniel dal 9 al 17 de auril pità doi mostres dla Vaile Export.
Tl Museion iel dan feter doi mënsc unì sotscrì ufizialmënter la candidatura dl Nord-est dla Talia per deventé capitela europea dla cultura 2019. La Provinzia de Bulsan ie reprejenteda dala diretëura dla repartizion per la cultura taliana Katia Tenti che ie presidënta dl cumité de candidatura y cun Karin Dalla Torre y Alexander Piccolruaz, di dipartimënc per la cultura tudëscia y ladina, tramedoi cumëmbri dl cumité.
La streda per deventé capitela dla cultura ie longia, dantaldut ajache l Nord-est dla Talia à na concurëza sterscia a livel naziunel. Per l cumité de candidatura se tratela te chësta prima fasa de mustré su ert y cultura sun de plu livei. “Per chësta rejon vëniel nce fat pea pra la “Settimana della Cultura”, che ie na bona ucajion per tre l nteres per la cultura y pité ntredes debant a mostres y manifestazions nce a jënt che se nteressea zënza manco de cultura” dij Katia Tenti.
Nce i autri cumëmbri dl cumité de candidatura, Karin Dalla Torre y Alexander Piccolruaz vëij la scumenciadiva sciche ucajion per sensibilisé: “la candidatura ala capitela culturela 2019 à la mira de mëter la cultura tl zënter dl nteres. L’ena dla cultura ie na bona ucajion per tré l nteres. Dantaprima Museion, che ie n museum de nteres nternaziunel per ert moderna y temporanea, dëssa vester n sëni de nteres per ert y cultura sun n basa plu lergia”.
Duta la nfurmazions sun l’ena dla cultura giaten sun la plata internet dl Minister talian ala cultura www.beniculturali.it.
as
