Atualità
Ediziun nöia de 'Aules' dedicada al suzès
USP - Le numer nü dla revista AULES é dedicada ala tematica dl suzès. Ara ne se trata nia ma de suzès y insuzès scolastich, mo ince de ciamps desvalis dla vita da vigni dé. Tla revista por les scores dada fora dal’ Intendënza Ladina, él da lì tesc' por ladin, talian, todësch y grijun.
La tematica dl suzès, particolarmënter atuala te nosta sozieté y tres plü competitiva, vëgn portada dant te deplü articui scrić sides da direturs y insegnanć dles scores y scolines ladines che da personal dl’ Intendënza y dl Istitut Pedagogich ladins. Porater él abstracts da dissertaziuns de studëntes ladines dla Facolté de Sciënzes dl’ Educaziun dl’ Université da Porsenù. Al vëgn inće portè dant intervistes spezifiches a rapresentanć fora de ambić de laûr desvalis, daolache al vëgn a löm la conesciun danter le percurs scolastich afrontè y le laûr chirì fora. Porater vëgnel tratè de situaziuns desvalies tl’ esperiënza direta cun scolars y te proieć spezifics.
Al é spo da ciafè sö informaziuns plü avisa porsura ala reforma dles scores altes, ai resultać dles competënzes linguistiches y dl stüde PISA, ala metodologia CLIL (content & language integrated learning) ti livei scolastics desvalis, al plurilinguism y ala regolamentaziun nöia por les proes INVALSI. Porater él na seziun nöia dedicada ala leteratöra ladina por renforzè le dialogh leterar danter les valades ladines.
Al é preodü da mët contignüs di proscimi numeri de AULES online söla plata web dl’ Intendënza Ladina. La tematica dl proscim numer dla revista, che gnará fora en gaujiun dl Dé dla Scora Ladina ai 9 de setëmber 2011, sarà i valurs che la scora y l’ educaziun en general dess dè inant.
usp
