Atualità

Scora / Cultura | 21.03.2011 | 11:50

D’autonn nasc l Lizeo d’Ert a Urtijëi: pusciblteies nueves dates dala reforma

USP – Cun l proscimo ann de scola muda l nseniamënt tla Scola “Cademia” a Urtijëi. Nchinamò fova la spezialisazion artistica la pert zentreda de chësta scola auta, d’autonn 2011 scumëncia n nseniamënt nuef ulache l ti unirà dat n majer pëis ala furmazion de basa. La reforma dla scola auta à nce purtà n inuem nuef: la Scola d’Ert devënta n Lizeo d’Ert. Iscrizions vën mo tëutes su nchin ai 31 de merz.

L Lizeo d’Ert a Urtijëi pieta d’autonn trëi sezions: ert figurativa, grafica y design. Da nuef iel dantaprima che l vën pità na furmazion de basa che dà, do la matura, de plu pusciblteies per jì inant. Aldò dla reforma sarà i prim doi ani per duc unfat. “Te chisc doi ani possa i sculeies udëi te ciun ciamp che i à plu legrëza y ulache i ie plu purtei” spiega l diretëur Karlheinz Mureda. Tla terza, cuarta y cuinta tlas vëniel pona pità la trëi sezions. N generel piterà l Lizeo d’ert na fundamënta per zapé ite ti ciamps dl’ert figurativa, grafica y desgin che possa vester l mestier da mparé o na na furmazion de spezialisazion sciche l’università o n’academia.

I ponc de forza de na furmazion tl Lizeo d’ert ie la fundamënta tl ciamp dla cultura dl’ert che gëura de plu portes. Tl cajo dl Lizeo a Urtijëi à nce l nseniamënt dla cater rujenedes, tudësch, talian, ladin y nglëisc n gran valor per la realisazion persunela di jëuni.

Ntan l’ultima enes iel stat gran nteres per la sezion de desgin, na sezion che vën a livel provinziel me piteda a Urtijëi. Tlo uniral pità na furmazion de basa per n ciamp drët lerch. Davia che la sezions vën pitedes dala terza tlas suvier, unirà i proscimi doi ani de scola nuzei per svilupé n program cuncret. “Aldò dl’esperienzes cun i sculeies che se scrij ite chisc dis, culaburazion cun esperc de design y l’università per design a Bulsan, uniral laurà ora i cuntenuc dla sezion nueva” spiega l diretëur Mureda. La sezion nueva de design à tëut ite la lerch dla sezion dl lën. L ziplé y l depënjer unirà nseniei tla sezion de ert figurativa.

Davia che la scola prufesciunela a Urtijëi sarà d’autonn sota la medema direzion sciche l Lizeo d’ert vëniel nce metù adum la pert che reverda l’artejanat artistich. L’idea ie de ti pité ai sculeies che se à dantaprima dat ju cun l artejanat artistich la puscibltà de fé l’ejam de matura.

Sëuraprò ala sezions, vëniel tl Lizeo d’ert nce sustenì l nseniamënt de mujiga. Tl cheder de materies opziuneles puderà sculeies che sona n strumënt fé lezions tla Scola de mujiga de Gherdëina. L se trata tlo de doi ëura al’ena che à n gran valor per l svilup dla persunalità di jëuni.

Nteressei possa tò su cuntat cun l Lizeo d’Ert a Urtijëi cherdan su l numer de telefonn 0471-796240 o nce tres la plata internet www.schule.suedtirol.it/ks-groeden/ ulache n possa nce se tò ju l formuler de iscrizion.

Materies y ëures de nseniamënt tl Lizeo d’Ert a Urtijëi

as

Galaria dales fotografies

Nchin ai 31 de merz possen se scrì ite al Lizeo d’Ert a Urtijëi;