Atualità
Liber sun la storia di ladins: cunferënza stampa ai 24 de merz
USP – L liber nuef sun la storia di ladins dla Dolomites pieta na panoramica a 360° sun storia y sun la realtà culturela di ladins tla cin valedes ladines. La publicazion nueva unirà prejenteda dai respunsabli dl Istitut Culturel ladin ‘Micurà de Rü’ deberieda cun l presidënt dla Provinzia Durnwalder y l assessëur Mussner n juebia ai 24 de merz, dala 12.00, tl Palaz Widmann a Bulsan.
“Storia dei ladini delle Dolomiti”, tla rujeneda taliana, mostra su l svilup dla cin valedes ladines Val Badia, Gherdëina, Fascia, Fodom cun Col Santa Lizia y Ampëz. Te 760 plates prejënta l autor Werner Pescosta n cheder generel pian via dala prestoria y ruvan nchin te nosc tëmps. Dantaldut la documentazion dl svilup culturel di ultimi 200 ani mostra su l sentimënt de identità ladina, testemunià da na lingia de studi. Tl liber nuef iel da udëi 400 fotografies, passa 30 chertes storiches, grafics y vinietes ilustratives per prejenté mo miec avenimënc politics, soziei, culturei y economics che à purtà al nascer y al svilup dla rujeneda, cultura y identità dla jënt ladina.
Culaburadëures di media ie nviei ala cunferënza stampa
n juebia ai 24 de merz
dala 12.00
tla sala stampa dl palaz Widmann, streda Crispi 3 a Bulsan.
L prejentazion dl liber “Storia dei ladini delle Dolomiti” unirà tenida dal presidënt dla provinzia Luis Durnwalder, l assessëur ladin Florian Mussner, l presidënt y l diretëur dl Istitut ladin Albert Videsott y Leander Moroder deberieda cun l autor Werner Pescosta.
as
