Atualità
Intendënza ladina y facolté universitara sön la formaziun di insegnanc'
La formaziun di insegnanc' nöia, aladô dl decret che gnarà fat aposta por nosta provinzia, é stè l’argomënt de n’incuntada danter i responsabli dla Scora ladina y i rapresentanc'dla Facolté de Sciënzes dla Formaziun a Porsenù.
Da pert dl’Université él gnü assiguré che al gnarà tignì cunt di bojëgns particolars dles scores y scolines ladines, dantadöt por ći che reverda la preparaziun paritetica y plurilinguala di insegnanć, cun labors linguistics aposta. Chësc é gnü fora dal’incuntada di 3 de merz a chëra che le surastant dla facolté Franz Comploj, le prof. Paul Videsott, l respunsabl dla repartiziun ladina Theodor Rifesser, l’Intendënt Ladin Roland Verra y les Ispeturies Edith Ploner y Romi Crazzolara à tut pert.
Tl’incuntada danter facolté univesitara y scora ladina él inće gnü presentè la proposta dl “manifest di stüdi” nü dla facolté, che ti dà al ladin la poscibilité da gnì reconesciü sciöche lingaz caraterisant (lingaz fondamentel per nsenië nce d’autra materies) chësc comportass na gran revalutaziun y le meso da insigné de plü contignüs por ladin. Al é inće gnü baié dla organisaziun dl practicum di studënć y dl curs “TFA” (tirocinio formativo attivo) por i insegnanć dla scora mesana y alta.
Al é gnü sotrissé la buna colaboraziun danter Intendënza y Université, inće tla prospetiva de proieć de inrescida y de formaziun da mëte a jì deboriada.
An se tol dant da portè inant regolarmënter la colaboraziun tl dagnì, tl interès de na formaziun sön mosöra di insegnanć dles scolines y scores ladines.
usp
