Atualità
Mile sculeies fej pea "prima la musica" dai 9 ai 18 de merz a Tlues y a Sëuc
USP – Feter mile sculeies de mujiga sarà dai 9 nchin ai 18 de merz cuncurënc dl cuncors de mujiga per dut l Tirol “prima la musica”. Chëst ann vëniel metù a jì tl Südtirol y coordinà dala Scoles de Mujiga de Tluses y de Sëuc. L’assessëures provinzieles Kasslatter Mur y Beate Palfrader dl Tirol à (ncuei) ai 4 de merz prejentà l cuncors a Bulsan.
Chëst ann arjonj l cuncors “prima la musica” n record nuef de cuncurënc. 990 mëndri y jëuni se à bele scrit ite, 315 de chisc ie dl Südtirol. De ndut iel set categuries, nsci se prejenterà 610 solisć cun l flaut, fagot y corn (Horn, Flügelhorn), tlarinet, oboe, posaune, flaut de traviers, saxofonn, bateria, tumbrëta y tuba. 390 sculeies de mujiga se prejenterà te ensambles.
L’assessëura Kasslatter Mur à dat pëis al gran mpëni che l ie debujën per n cuncors cun tanc che fej pea. “L cuncors juda a auzé l livel dl fé mujiga y susten i talënc” à dit l’assessëura. Cun la mujiga mpera i jëuni truep per la vita, nsci l’assessëur dl Tirol, Beate Palfrader: “N cunfront rëidl, mutivea. Ma al prim post muessa vester la pascion per la mujiga”.
Al cuncors de mujiga fej pea sculeies de dut l Tirol storich y nsci nce sculeies de rujeneda ladina. “Pudëi mustré ca cie che n à mparà y pudëi viver mumënc de suzes sun palch ie de gran valor per l svilup dla persunalità de nosc sculeies” nsci l pensier dl assessëur Florian Mussner. L cuncors ne ie nia me per se museré, ma dantaprima n’ancunteda culturela per la generazion nueva.
La giuria dl cuncors ie metuda adum da passa cënt musizisć, artisć y maestri dla scoles autes dl’Austria, Svizra y Deutschland. La valutazion che unirà dates juda a capì a ce livel che n ie cun l nseniamënt de mujiga. Per dé ndicazions ai jëuni per l daunì di jëuni tla mujiga vëniel nce pità de rujené cun cunsulënc che ti ultimi ani ie for plu damandei.
as
