Atualità
Nuef cuncors de leteratura ladina: sustëni ala rujeneda
USP - Opres letereres ti dà na majera richëza a na rujeneda. Cun chësc pensier sustën la Provinzia de Bulsan chëst ann inò autëures ladins cun n cuncors de leteratura. Per stories adatedes a jëuni y jëunes iel da vëncer de plu pesc’ per na soma de 6.000 euro. Autëures ladins possa nchin ala fin de mei 2011 mandé ite si pec tl Ufize provinziel per la Cultura Ladina.
L argumënt dla terza edizion dl cuncors de leteratura ie unì dedicà al curaje zevil, l daunì y la lidëza n referimënt ala junanza. “Te nosta rujeneda ladina iel puecia leteratura spezifica per jëuni y nsci ons ulù dediché l cuncors da chëst ann propi a pec per jëuni” spiega l assessëur ladin Florian Mussner.
Nchin ai 31 de mei 2011 possen mandé ite stories scrites per gherdëina o per badiot. La Repartizion provinziela ala Cultura y Ntendënza ladina à udù dant doi categuries aldò dl età: jëuni danter 16 y 19 ani y pona mo duc sëura i 20 ani. Per uni categuria ie l prim pest de 2.000 euro y l segondo de 1.000 euro.
La bandida dl cuncors lascia mé pro n sëul lëur per persona che mesura almanco cin plates DIN A4 cun 4.000 paroles. La stories damandes ne possa nia vester na traduzion y ne possa nia vester bele publichedes. L vën damandà stories urigineles. I particuleres dla bandida dl cuncors possen nce liejer do tl internet sot a www.provinzia.bz.it/leteratura.
La stories mandedes ite per l cuncors che vën valutedes aldò, unirà nce publichedes te n liber. Per l cuiertl dl liber uniral pona te n segondo mumënt scrit ora n cuncors per la grafica.
I lëures per l cuncors leterer „Autëures Ladins Scrij 2011” unirà valutei da na cumiscion de sies cumëmbri. Marco Forni ie unì numinà presidënt de cumiscion. Deberieda cun ël iel mo Roberta Dapunt, Isabella Ties, Claus Vittur y Margherita Senoner. L lëur de secretera se à sëurantëut Barbara Perathoner dl Ufize provinziel per la Cultura ladina. Ëila ie nce la persona de referimënt per nfurmazions plu avisa (telefonn 0471 41 70 21).
I lëures letereres possa unì dai ju nchin ai 31 de mei 2011 tl Ufize per la Cultura ladina, streda Bottai 29 a Bulsan.
Dl 2003 fovel per l prim iede unì scrit ora n cuncors de leteratura ladina. Ivan Senoner y Maria Pedevilla ova venciù chësta prima edizion. Dan cater ani à la Repartizion provinziela ala Cultura y Ntendënza ladina scrit ora l cuncors per n segondo iede y chësc ie unì venciù da Ivan Senoner y Iaco Rigo.
as
