Atualità
Regulamënt dl’università plu sciorf n cont de rujenedes
USP – La Jonta provinziela ie stata a una che l’università se damande n livel plu aut dla rujenedes per scumencé n studi. “La forza dl’università de Bulsan ie la rujenedes, perchël sustenions i pruvedimënc per auzé l livel de chësc pont de forza” à dit l presidënt dla provinzia.
Per se scrì ite al’Università de Bulsan muessen savëi tudësch, talian y nglëisc. Aldò dl urdenamënt de studi nuef, dat pro (ncuei) ai 7 de fauré dala Jonta provinziela, muessen mustré su n livel plu aut per pudëi scumencé n studi.
“Per l Bachelor, l studi de trëi ani, muessen demustré da savëi almanco doi rujenedes al livel B2, che ie feter sciche l bilinguism B” à dit Durnwalder. Ntan l prim ann de studi iel pona da dé n ejam dla terza rujeneda.
Per l Master, l studi de doi ani do la minilaurea, muessen mustré su l livel plu aut, l C1, per almanco una rujeneda. Na segonda rujeneda muessen savëi al livel B2.
L urdenamënt nuef vëija nce dant che i studënc miureie la cunescënza dla rujenedes ntan l studi, dajan nce ju n ejam. Studënc dl Bachelor muessa nchin ala fin dl studi arjonjer l livel C1 te una rujeneda, l livel B2+ tla segonda rujeneda y l B2 tla terza rujeneda. Studënc dl Master muessa nchin ala fin de si studi avëi arjont l livel C1 per doi rujenedes y l B2 per la terza rujeneda.
as
