Atualità
N vënderdi, l Di dla Cultura Ladina 2010
USP – N vënderdi che vën, ai 22 de utober uniral tl palaz Widmann a Bulsan tenì l di dla Cultura Ladina. La mpurtanza y la funzion di media per na mendranza y si rujeneda sarà l argumënt a chël che n ti jirà plu sot. Chësc di uel nce vester n viere tres chël che la mendranza ladina se gëura al’autra grupes de rujeneda.
L presidënt dla Provinzia Luis Durnwalder y l assessëur Florian Mussner giaurirà l Di dla Cultura ladina cun na ntroduzion. La lerch che i media se à fat te nosta vita y si funzion per na mendranza ie n argumënt che reverda nce l’autra grupes de rujeneda tla provinzia. Nscì possa l ejëmpl ladin vester de nteres per traté chësc argumënt de atualità, esprescion de nosc tëmps.
Mariano Tschuor, diretëur dla Televisiun Rumantscha, prejenterà la situazion ti Grijons fajan referimënt al’evoluzion di media rumanc y la perspetives de svilup per l daunì. La realtà rumancia possa vester n ejëmpl per i media ladins.
Ennio Chiodi, vizediretëur de RAI 3, purterà la vijion di media tla mendranza da doi ponc de ududa: da dedite y da dedora. Chiodi cunësc drët bën la situazion dla mendranza ladina y tl medemo mumënt nce la realtà di media de mendranza a livel naziunel.
Do i doi referac uniral tenì na descuscion cun l assessëur Florian Mussner, l diretëur dla RAI de Bulsan Carlo Corazzola, la redadëssa de Gana Ingrid Runggaldier y l diretëur de La Usc di Ladins Iaco Rigo. “Uni un ie nvià a chësc danmesdì per udëi la posizion de mendranza tl cheder di media n relazion ala problematiches che i cumporta” nscì Alexander Prinoth, diretëur dla repartizion per la Cultura Ladina y respunsabl per l’urganisazion.
Duc i nteressei y i reprejentanc di media ie nviei al Di dla Cultura ladina,
n vënderdi 22 de utober
dala 9 danmesdì
tl palaz Widmann, streda Crispi 1 a Bulsan.
as
