Atualità
Duman scumëncia i ejams de maduranza: posizion de Mussner y Verra
USP – L scumenciamënt di ejams de maduranza, duman 22 de juni, pieta ucajion al Assessëur provinziel ladin y l Ntendënt ala scola ladina de fé n cheder dla situazion danter reforma y promozion dla rujenedes. Mbincian dut l bon per i ejams de maduranza vëniel sorissà l bujën de recunescënza dla matura paritetica per l ejam de bilinguism.
L assessëur Florian Mussner y l ntendënt Roland Verra scrij: “Do n ann de scola dassënn mpurtant per l’atuazion dla reforma dla scolina, dla scola elementera y dla scola mesana, iel unì laurà ora l dessëni de lege provinziel per la reforma dla scola auta. Iust chësc livel de furmazion dëssa unì refurmà aldò di bujëns dla populazion da tlo y perchël uniral metù ndrova cun l ann de scola 2011/2012.
L ie da ti fé na lauda a duc i culaburadëures dla scolina y dla scola ladina per si sforc tla atuazion dla nueva ndicazions provinzieles, per renuvé l nseniamënt aldò dla metodologies da al didancuei.
Da pert dla Ntendënza Ladina iesen tl lëur de studië n cunzet nuef per la promozion de duta la rujenedes de scola, sibe l ladin che l talian, l tudësch y l nglëisc. Man man che la reformes vën cuncretisedes, unirà nce chësc cunzet aplicà cun l aiut de personal spezialisà.
N cont dl ejam de maduranza dla scoles ladines iel da dì che chësc se damanda n sforz particuler dai candidac, ajache l ie da tenì cont dl model paritetich y da seguré l medemo resultat tl talian y tl tudësch. Chësc sforz sëuraprò tuchëssa da unì recunesciù ai fins dl valor che giapa l titul de maduranza arjont tla scoles ladines, ënghe ai fins dl recunescimënt dl patentin „B“.
N ucajion dl mëter man de chësc ejam mbincia l assessëur provinziel Florian Mussner y l ntendënt Roland Verra dut l bon ala studëntes y ai studënc y ala cumiscions de ejam, se mbincian che i possa arjonjer i miëur resultac. De gra ai diretëures, ispetëures, nsenianc y aministrazions dla scoles per si mpëni ntan l ann de scola. Ai sculeies cun si families y a duc chëi che lëura pea te scola n bel instà da paussé.”
as
