Atualità
Architetura y cultura pra l di dla cultura ladina
USP – L’architetura tipica dla valedes ladins possa unì mantenida nce sce l’abitazions vën renuvedes. De chësc vieres uel l Assessorat Ladin dla Provinzia sensibilisé n ucajion dl di dla cultura ladina, n juebia 2 de utober a Bulsan.
L argumënt zentrel dl di dla cultura ladina da chëst ann ie “Architetura y cultura: Ce funzion à pa la cultura dl frabiché y dl abité n relazion al’identità?”. Tla prima pert dl danmesdì tla cësa provinziela Widman a Bulsan cialerà n iede l Assessëur ladin y l Presidënt dla provinzia purté dant si vijions de co che l possa unì mantenì sibe l’architetura che nce la cultura respetan tramedoi pertes. Na valutazion plu tecnica dl argumënt prejenterà pona i architec Andreas Gottlieb Hempel y Carlo Calderan. Ëi prejenterà la perspetives de n architetura regiunela y dl svilup che l architetura possa avëi te nosta valedes.
La segonda per dl danmesdì dla cultura ladina ie dedicheda a na descuscion. Pra na mëisa turonda de aministradëures y architec uniral rujenà dla situazion atuela n cont de architetura, de identità tl raport cun l’architetura y sce l se lascia mëter diretives ala proietazions. D’autri argumënc dla descuscion ie nce criteries per frabicac culturei y prupostes cuncretes per l frabiché respetan nosta cuntreda de valor fundamentel.
L di dla cultura ladina scumëncia duman, juebia 2 de utober dala 9 da duman tla cësa provinziela Widmann a Bulsan. La populazion de duta trëi grupes de rujeneda ie nvieda a unì a scuté su y fé pea chësc cunvëni.
as
