Atualità
Pest "Na vila de valüta"
USP - L’impëgn de mantignì y restrotoré les viles dla Val Badia onorëia l’Assessorat Ladin dla Provinzia de Balsan cun le pest “na vila de valüta”. Le pest che é gnü scrit fora por le pröm iade é de 7.000 euro. “Les viles é de gran valur, porchël orunse onorè chi che ciara de ëres cun gran pasciun, insciö l’assessur Florian Mussner.
Le fin prinzipal dl pest é chël de sostignì le mantignimënt dl’arpejun culturala y architetonica dles viles tla Val Badia. “I paurs y düć i patruns che se fistidiëia particolarmënter de mantignì les viles garantian inće les condiziuns che ares restes popolades, dess gnì onorà” insciö l’assessur Florian Mussner. La carateristica tipica dles viles é de gran valur por döta la valada. Ares rapresentëia na simbiosa de cultura, natöra y architetöra de livel alt. “Pian ia dales viles val debojëgn en cunt de frabiches de stravardè la natöra y la contrada por le dagnì” insciö Florian Mussner.
I Comuns dla Val Badia po dè jö ćina i 27 de jügn propostes de viles che é gnüdes fates danü, che é gnüdes comedades o che é gnüdes ingrandides. Por le pest vëgnel inće tut en conscidraziun laûrs che é gnüs fać pro lüsc cun de plü strotöres y proieć por le mioramënt dla vila y de süa contrada.
En chësta ocajiun oressi propi inće rengrazié i Comuns por la colaboraziun y i perié de menè ite plü proieć che ara va, deache i sun dla convinziun che al é gnü fat ti ultimi agn de bi laûrs tles viles dla Val Badia, che se mirita de gnì premià y inće mostrà al publich tres na mostra.
Le pest de 7.000 euro ti jarà al patrun dla vila premiada. Por le proietant él odü danfora na nominaziun de lalt. I proieć - che gnarà dà jö tl Assessorat Ladin cun fotos, n plann dl raiun, dessëgns y na descriziun - gnarà valutà da na comisciun de esperć. Les set porsones che fej pert dla comisciun vëgn dal ćiamp dl’architetöra, dla cultura y dl mantignimënt dla contrada. La valutaziun gnarà fata aldô dla cualité dl intervënt, la importanza dl laûr por le ćiarè fora dla vila y le respet por aspeć culturai y monumentai. Le pest por la vila de valüta gnarà spo inće chirì fora aldô de tan bëgn che le laûr che é gnü fat passenëia tl cheder general dla vila. N critêr de valutaziun é inće le fin dl intervënt y tan che al rapresentëia na simbiosa danter inovaziun y tradiziun.
I proieć menà ite por chësc pest ti gnarà presentà al publich te na mostra.
as
