Atualità
Cumité provinziel per l’evaluazion dla scoles ladines: numinazion di cumëmbri
USP - L cumité de bën cin persones per l’evaluazion dla cualità dla scoles tla valedes ladines ie unit numinà dala Jonta provinziela su ncëria dl assessëur Florian Mussner n lunesc de chëst ena. “L lëur de chësc cumité ie de gran mpurtanza: mustran su i aspec positives y negatives dla scoles ie chësc lëur la fundamënta per perfeziuné la cualità de nosta scola”, nsci sotrissea l assesssëur Mussner.
I cumëmbri nueves de chësc cumité ie Gerda Videsott, assistënta tla facoltà de furmazion tl’università de Persenon y Alfred Irsara, diretëur n pension dla repartizion Scola y Cultura ladina. Lois Ellecosta, Theodor Rifesser y Evelin Moroder ie unic cunfermei te si ncëria. L assessëur ti mbincia truepa legrëza y n bon lëur ai doi cumëmbri nueves y rengrazia Heidi Runggaldier y Edith Dapoz per l lëur fat ti ultimi ani. Tres l’evaluazion possen for inò miuré la scola te duc si aspec, nsci l assessëur. Ti ultimi cater ani ie unides evaluedes duta la scoles, dala elementera ala socla auta. Śën iesen ntlëur de lauré ora i dac. A uni scola ti uniral comunicà i resultac y ti uniral dat n feedback acioche la scola posse, sce l va de bujën, tò ite direzions nueves.
Da auzé ora ie l mpurtanza dl cumité canche l se trata de ti sté do a nrescides sciche per ejëmpel la nrescida Pisa: Paradlé la cualità de nosta scoles a scoles naziunels y nternaziuneles ie de gran mpurtanza per l svilup dla scola ajache chësc cunfront nes da la puscibltà de analisé la gauja de nosta loces.
L cumité nuef perjenterà uni ann n program y tulerà la dezijion ciun aspet dla scola che unirà analisà. Te uni scola iel n cuordinadëur per l’evaluazion. Tla cumpetënzes dl cumité toma nce ite la furmazion di cuordinadëures per l’evaluazion tla scoles acioche chisc posse evalué cër aspec sciche p.ej. la relazion danter genitores y scola, l rendimënt scolastich y l rendimënt di sculeies y .n.i. Sëuraprò à l cumité l duvier de purté dant tla scoles la normes scolastiches nueves y de les evalué. L ann passà iel per ejëmpel unit fat na evaluazion sun la materies facultatives.
“L se trata de analisé la scola ladina cun si partiuclariteies sotrissan sibes i aspec positives che chëi negatives per pona cialé de perfeziuné nosta scola. La cualità dla scola ie de gran mpurtanza per anjenië ca nosc mutons per l daunì”, nsci l assessëur Florian Mussner.
USP
