Atualità
La materies de nseniamënt per la segonda proa scrita dla matura ie unides ora
USP - I sculeies y la sculées che fej chëst ann la matura possa śën se arjinië ca plu a puntin per l ejam de matura. La Ntendënza ladina y l Ministero a Roma fej al savëi la materies che unirà chëst ann purtedes dant pra l segondo ejam scrit dla matura. Nce la materies per chëles che vën udù dant n ejaminadëur da dedora ie ruedes ora.
Tla valedes ladines tulerà i sculeies y la sculées dla cuinta tlas dl Istitut tecnich per l cumerz de La Ila y Urtijëi, dla scola d’ert de Urtijëi y dl lizeo linguistich a La Ila pert al ejam de matura.
L prim ejam scrit unirà tenì ai 18 de juni 2008. Al plu tert ai 11 de lugio uniral stlut ju i ejams.
L Ntendënt Roland Verra lascia al savëi la materies ruedes ora pra la segonda proa scrita:
-economia aziendela per la sezion tecnica dl Istitut tecnich per l cumerz de Urtijëi y La Ila
-nglëisc y spanuel per la sezion turistica dl Istitut tecnich per l cumerz de Urtijëi.
- i sculeies y la sculées dla scola d’ert muessa mustré su si cumpetënzes tla materies dessëni y depenjër, scultura o grafica
-nglëisc y franzëus ti vëniel damandà ai sculeies y ala sculées dl lizeo linguistich de La Ila
Tla materies tudësch y talian unirà i sculeies damandei ora da ejaminadëures da dedora. Tla scola d’ert de Urtijëi y tl lizeo linguistich uniral nce damandà ora matematica da n ejaminadëur da dedora. Tla sezion tecnica dl ITC de Urtijëi y la Ila unirà la materia matematica aplicheda damandeda ora da ejaminadëures da dedora; tla sezion turistica dl ITC de Urtijëi la materies giuridiches y economiches.
USP
