Atualità
Forum cultural sura l’tema dla musiga ai 20 d’otober a Sëlva
La musiga é chësc ann le punt zentral dl forum cultural ladin, che gnarà metü a jì en sabeda ai 20 d’otober 2007 a Sëlva. Le forum vëgn organisé dal assessorat ladin por la cultura y dala consulta provinziala por la cultura ladina.
L’ofize provinzial por la cultura ladina organisëia vigni ann, en colaboraziun cun la consulta por la cultura dl grup linguistich ladin, n forum sura la cultura ladina. Le punt zentral dl’incuntada de chësc ann é la musiga.
La pedagoga de musiga Heidi Stuffer spligarà plü avisa te n referat les particolaritês dla terapia musicala y süa aplicaziun, tignin cunt de söa esperiënza spezifica. La terapia musicala é na metoda che vën adorada por curé la sanité dl corp y dla mënt cun l’aiüt dla musiga. Dala musiga val fora n gröm de influsc positifs. La terapia musicala varësc cun l’aiüt de sonns.
Dedô gnaral tignì na discusciun pro la mësa torona, cun l’assessur por la cultura ladina Florian Mussner y i direturs dles scores de musiga dla Val Badia y de Gherdëna, Raimund Pitscheider y Vinzenz Senoner, por i cors, Gerhard Piccolruaz, por les musighes, Carlo Castlunger y en rapresentanza di ćiantauturs ladins, Iaco Rigo. La discusciun vëgn moderada da Alexander Stuffer. Intratenimënt musical, Alessandro Trebo y Christian Pescosta.
Le forum vëgn tigni en sabeda, ai 20 d’otober tla ćiasa de cultura a Sëlva. Dër bel invià é i rapresentanć dles uniuns ladines, i ombolć y i assessurs por la cultura di comuns, sciöch’ inće düć i interessà. Le lingaz dl forum é le ladin.
I massmedia é invià a tó pert al Forum Cultural en
sabeda ai 20 d’otober,
dales 15:00
tla ćiasa de cultura a Sëlva
y informé.
USP
