Atualità
Di nternaziunel di nsenianc y dla nseniantes
I 5 de utober, Di nternaziunel di nsenianc y dla nseniantes, ie na bona ucajion per ti dé na majera valuta al lëur dla nseniantes, di nsenianc y de duta la educadëures dla scolina. I assessëures ala scola Florian Mussner, Otto Saurer y Luisa Gnecchi sotrissea la mpurtanza y la respunsabltà che à nseniantes, nsenianc y educadëures te nosta sozietà. La va de sustënì l personal pedagogich te si lëur che deventa da ann a ann for plu rie.
L 5 de utober ie unit proclamà dal UNESCO di nternaziunel di nsenianc y dla nseniantes. “Nsenië ie n bel mestier y duc se aspieta truep dai nsenianc y dala nseniantes”, nsci i trëi assessëures. L ie n lëur sfadiëus ma l dà truepa sodisfazions. Tl daunì saral for plu y plu de bujën de abiné l balanz danter dé inat savëi y eduché nosc mutons y nosta mutans. Ma la scoles y la scolines ne possa nia ti ressolver duc i problems ai jëuni. L muessa nes vester tler che i jëuni muessa mparé a cunëscer valores nce ora de scola. L urientament ie de gran mpurtanza te nosta sozietà che se muda tan aslune. “Chësc ne possa nsenianc y nseniantes nia fé da sëui, tlo muessa la familia, l’aministrazion y la politica judé pea. Nëus piton n sistem de furmazion che ti dà la medema oportuniteies a duc”, nsci i trëi assessëures. L recunescimënt che la sozietà ti dà ala nseniantes y ai nsenianc ne ie nia for chël che ëiles y ëi se meritëssa; perchël vala de i sustënì te si lëur.
“Nëus rengrazion duta la nseniantes y i nsenianc y duta la educadëures per si mpëni y ti mbincion truepa energia y sodisfazion te si lëur de furmazion”, nsci l’assessëura Gnecchi y i doi assessëures per la scola.
USP
