Atualità
L „Pic Museo Ladin“ de San Ciascian dess deventè n destacamënt dl Museum Ladin
USP - L „Pic Museo Ladin“ de San Ciascian dess deventè n destacamënt dl „Museum Ladin Ćiastel de Tor“. Chësta é stada la dezijiun tuta ai 28 de agost dal Presidënt dla Junta Provinziala Luis Durnwalder y l’ Assessur Florian Mussner adüm cun i responsabli dl Museum, dl comun y dla fraziun.
Trëi dess ester i temesc prinzipai trata tl destacamënt dl Museum Ladin. Al gnará presentè l monn dles liëndes ladines, na gran coleziun de curëć y l’ ander dles laûrs de Conturines, olâ che al é gnü ciafè scheleć de laûrs che a vit dan da 100.000 agn.
Les tematiches mëtüdes en mostra tl destacamënt raprejënta na bona integraziun ai argomënć bel tratas tl Museum Ladin Ćiastel de Tor. De chësta minunga é inće l Vizepresidënt di Musei Provinziai de Südtirol Heinrich Huber, che alza fora l importanza di temesc presentá, insciö la pënsa inće l Diretur dl Museum Ladin Stefan Planker y l Presidënt dl “Pic Museo Ladin” Renato Andreolo.
A San Ciascian gnaral metü a desposiziun na spersa de 400 mq. La provinzia dará l so sostëgn al projet sura l Museum Ladin e se cruzierá dl aredamënt y dla gestiun dl museum, chësc é gnü assiguré dal Presidënt dla Junta Provinziala Luis Durnwalder y l’ Assessur Florian Mussner. Indere ne gnaral nia adorè mesi dla provinzia por l finanziamënt dl fabricat. Al se trata sëgn de stlü jö n pröm contrat, poscibilmënter por plö agn. L proiet è stè tut sö positivamënter inće dal Ombolt de Badia Ugo Dorigo y dal Surastënt dla Fraziun de San Ciascian Thomas Pescollderungg.
USP
