Atualità
Ai prim de juni va l Assessëur Mussner a crì la Repartizion Ladina dla Università de Persenon
USP - N cheder dla pusciblteies de furmazion per la nseniantes y maestres dl daunì, ma nce n cheder di proiec de nrescida dla catedra nueva de ladinistica uel l Assessëur Ladin Florian Mussner se fé n venërdi, ai prim de juni 2007. Domesdi va l Assessëur a crì la Repartizion ladina dla Facultà de scienzes dla furmazion dla Università liedia de Bulsan a Persenon.
Pra si vijita tla Repartizion Ladina dla Università de Persenon se nfurmerà l Assessëur ladin Florian Mussner plu avisa n cont dla inuvazions dla ufiertes de furmazion per la nseniantes dla scoles elementeres y la maestres dla scolines, ma nce n cont di cursc de spezialisazion per i nsenianc dla scoles segonderes (SSIS). Oradechël se nteressea l Assessëur nce dl plann de stude per la studëntes i y i studënc ladins, di proiec de nrescida y n generel dla ufiertes dla Repartizion ladina dl’Università. N ucajion de chësta ancunteda cun la persones respunsables dl’Università iel prugramà de tematisé la mesures per la defendura dl ladin tla scoles y la prupostes dla Intendënza per la scoles, sciche nce i bujëns dla scoles singules y dla scolines. Ntan si vijita tla facultà de scienzes dla furmazion chirerà l assessëur nce l cuntat cun la studëntes y i studënc.
I media ie nviei de unì al’ancunteda
dl Assessëur ladin Florian Mussner
cun la Repartizion ladina dl’Università liedia de Bulsan
Bahnhofstraße 16 a Persenon
n venërdi, ai prim de juni 2007
dala 15.00.
L’ancunteda ie tl local 1.35 tl prim partimënt.
USP
