Atualità
Nsenië te raions cun plu rujenedes
USP - Dai 17 ai 22 de setëmber se abinerà tla sënta dl Istitut Pedagogich Ladin y dla Ntendënza Ladina a Bulsan 20 nsenianc y nseniantes da de plu pertes dl’Europa. L fin ie n curs de furmazion per nsenianc che lëura te raions cun plu rujenedes y leprò na rujeneda de mendranza.
I maestri, duc dla scola elemetera, vën dal Friul, dala Ciarënzia, dala Slovenia, dala Sardegna, dal Wales y sambën dala Ladinia.L se trata de n curs de furmazion paià dala Cumiscion Europeica tl cheder de n proiet Comenius. La grupa de lëur de chësc proiet (INFO – Individuazion de n model de furmazion) à laurà ora l model dl curs do avëi studià sun i bujëns di maestri, di genitores y di reprejentanc politics y culturei dl raion. La nrescida ie unida fata te duc i raions europeics che tol pert al proiet (Austria, Italia, Slovenia, Wales) y i resultac unirà publichei tosc.
I moduls dl curs tol ite cuntenuc che ti va bën a duc i maestri che nsenia la rujeneda dl’oma deberieda cun d’autri lingac. L curs vën partì su te de plu moduls y veij danora tematiches sciche la legislazion ti raions de mendranza, la politica linguistica, i modiei de nseniamënt dla rujenedes, la elaborazion de material didatich y n.i.
L se trata de n prim esperimënt y dla prima ucajion per nsenianc che vën da de plu raions de mendranza per se abiné y sté adum per n’ena ntiera. L mparé deberieda contenuc che possa jì bën per duc i raions de mendranza dl’Europa, cunfronté i sistems de scola defrënc, fé n var deberieda sun l ciamp dl nseniamënt dla rujeneda dl’oma ie dessegur de gran valor.
I reladëures dl curs sarà nsenianc dla universiteies talianes y de oradecà, esperc dl setëur y maestri cun esperienza de nseniamënt. Dla valedes de Gherdëina y Badia tulerà pert 4 maestri, un per direzion raionela, y na maestra che purterà dant l model de nseniamënt cun de plu rujenedes (educazion linguistica ntegreda).
Cun chësc curs se cualifichea la scola ladina a dé n cuntribut al nseniamënt di lingac de mendranza tl’Europa. Dut l proiet, dala nrescida al curs y ala publicazion dl material ie tla mans dl Istitut Pedagogich Ladin che, deberieda cun i partners europeics nueves, mët a jì l curs europeich.
USP
