Atualità
Zitadins d’Europa: Mi Europa
Cun na manifestazion sun plaza a Urtijëi ie finà via l proiet “Zitadins d’Europa: Mi Europa” dl Istitut Tecnich cumerziel de Urtijëi. I studënc ti à prejentà al publich i lëures che i à fat te tlas.
La manifestazion sun plaza S. Antone de Urtijëi dan n’ ena ie unida stluta ju cun l proiet “Zitadins d’Europa: Mi Europa” dl ITC de Urtijëi. I studënc y la studëntes à purtà dant ala jënt l lëur fat te scola: la storia, l’evoluzion y l dauní dla Union Europeica.L mumënt zentrel dla scumenciadiva sun plaza ie stat l referendum cun la dumanda: “Ies’a tu a una cun l’idea de na Costituzion Europeica?” 248 persones à respundù – ambolc, reprejentanc dla politica provinziela, jënt de Urtijëi y ghesc’: 199 à dit de sci, 47 à dit de no y 2 schedes fova zenza valor. Nce sce l referendum fova mé na simulazion, desmostra l result n gran nteres ti cunfronc de na unità europeica che va sëura la union cumerziela ora y dl viers de na union de populazions, cultures y rujenedes.
L video che unirà ora d’ansciuda tla trasmiscions RAI (ladina, taliana y tudëscia) y che deventerà material didatich per d’autri studënc dla provinzia cunterà dla storia dl’Europa sciche mé i studënc cun si fantasia ie boni. Szenes sun la storia cuntedes y nterpretedes diretamënter da d’ëi, coche ëi à udù y ntendù l prozes de unificazion y coche ëi veij l daunì dl’Europa tres n nutizier che vën mandà n onda tl’Europa dl 2036. N cumplimënt da pert dl Assessëur Mussner ti va ai studënc y la studëntes che à fat te n’ena trëi proiec te un: ti jì plu sot ala tematiches, scrì i tesc’ per la plata-web y l video-curt, deventé atëures per la imajes dl video. La plata-web sarà njinieda per la fin de merz y l video unirà prejentà te scola ala fin de mei. Duc ie bele sën nviei de cuer.
L proiet à abù n gran suzes per l mpëni nia mé di studënc y dla studëntes ma de duc chëi che à laurà pea: i prufessëures Rosalia Ongaro y Patrick Prinoth, Samuele Pii, che à tenì i workshops te scola y à metù ju l’idea per la plata-web y l video-curt y i regisc’ dla RAI Anna Mazzel y Leo Senoner, che à judà tres duta l’ideazion dl proiet, a tò su la imajes y a fé l tai dl video-curt.
UV
