Atualità
Sustenimënt dla cultura ladina: plann anuel apurvà dala Jonta provinziela
(USP) L di dla cultura ladina, l forum culturel, na cunlaurazion strënta cun i Grijons y nia per ultim finanziamënc de sustëni per artisc y assoziazions cultureles: chisc ie i ponc zentrei dl plann anuel 2006 tl ciamp dl sustëni dla cultura ladina y dl’atività educativa, che ie sën unì apurvà dala Jonta provinziela sun dumanda dl Assessëur Florian Mussner.
"Tl plann anuel vëniel tëut n cunscidrazion sibe scumenciadives locales, che nce proiec che vëija danora n barat danter ladins de regions defrëntes per lauré ora carateristiches medemes y defrëntes y per crië cuntac nueves", spliega Florian Mussner. L sustenimënt de mostres, reprejentazions y publicazions, dlongia i cuntribuc per nvestizions y ativiteies tl ciamp culturel y de furmazion ie perchël una dla seves plu mpurtantes di pruvedimënc culturei tl plann anuel. "Na mpurtanza particulera ti vën data al fat che nosc sustenimënc vede a bën de persones jëunes, y chël, sibe per cie che reverda i artisć che l publich", dij Mussner. Chësc ënghe pervia che l ie da usservé iust nce danter i jëuni y la jëunes n for majer nteres per la cultura y la storia ladina.Na segonda seva de sustëni dla cultura ie reprejenteda dala scumenciadives che vën sustenides o purtedes inant dala Provinzia. N bel ejëmpl n chësc cont ie l "di dla cultura ladina“, n chël che l vën n iede al ann purtà a descuscion cuestions de atualità sun tematiches revardëntes la cultura ladina. Na segonda scumeciadiva ie chëla che vën tlameda l "forum culturel", pra chël che la cunsulta ala cultura provinziela y l ufize provinziel curespundënt se anconta cun persones dla valedes ladines atives tla cultura y tl’ert per rujené sun la cultura ladina y sun la azions che fossa da mëter a jì per ti dé mpulsc ala cultura ladina.
La terza seva ie la scumenciadives de proiec che va sëura i cunfins ora y che mira a n majer barat danter i ladins de regions defrëntes. Tlo ne pënsen nia mé ai ladins dla Dolomites che viv dedora da nosta provinzia Südtirol, ma nce ai Rumanc dl cianton svizer di Grijons. Te chësc ciamp ie ududa danora la criazion de na purtela internet che dëssa purté pro a n barat de grupes de mujiga y de artisć y al svilup de na cunlaurazion tl ciamp dl marketing culturel.
L ann 2006 sarà perchël n ann "plën de scumenciadives mëndres y majeres, che reprejentea adum n nrichimënt per la vita culturela tla valedes ladines", nsci l Assessëur Mussner, che spera nce che veluna de chesta scumenciadives nes gëura nce vel pruspetiva nueva, che nes lasce cialé tl daunì cun otimism, nsci l Assessëur ladin Mussner.
USP
