Atualità
Dé europeich di lingac: comunicat di 3 assessurs ala scora
USP - Tl’ Europa vëgnel baié za. 200 lingac. Na gauja chësta por festejè chësta pluralité en le “Dé europeich di lingac” ai 26 de setëmber y por recordè l’importanza di lingac, a pié ia da chël dla uma. “Le lingaz dla uma é la fondamënta por düc i atri lingac. Tl lingaz dla uma virel mîc arcaics, liëndes y cunties, la storia y le pinsier de n popul”, scrî i assessurs ala scora Florian Mussner, Otto Saurer y l’assessuria Luisa Gnecchi.
La conoscënza de deplü lingac é nezesciara por che al suravires la pluralité linguistica y culturala dl’Europa. Al é n strumënt important por jì tl monn dl laûr, por se integrè sozialmënter y por podëi se möie aladô dles ghiranzes dla mobilité dl monn dl laûr al dedaincö.I messùn odëi ite che le lingaz n’é nia val’ de stare, mo che al se svilupëia cun les porsones tla vita da vigni dé. “N lingaz po ma suravire sce i geniturs le baia cun sü mituns tla vita da vigni dé, te familia, sce al vëgn adorè te scora y tl tëmp lëde” dij inant tl comunicat.
Al dess gnì anuzé dötes les ocajiuns por mëte man adora assà da imparè inće lingac nüs. I savun tan important che al é da gnì confrontà cun d’atri lingac bele denant co pié ia a scora, dij l’assessur Mussner.
La promoziun dl lingaz dla uma y di atri lingac che vëgn insignà mëss gnì sostignida te düć sü aspeć: l’aldì, le baié, le lì y le scrì. La conoscënza de deplü lingac é na gran richëza y al n’é mai massa tert por se dè jö impara. Al vëgn desmostrè scientificamënter che la conzentraziun tl’eté atempada é majera pro les porsones che baia deplü lingac. “Deplü lingac mantëgn le ciorvel te n bun eserzize y al resta plü dinamich da imparè cosses nöies”, vëgnel scrit tl comunicat di 3 assessurs ala scora Mussner, Saurer y Gnecchi. “Chësta é na gauja implü por imparè d’atri lingac inće ćiamò plü tert”.
USP
