Atualità

Scora / Cultura | 26.05.2005 | 18:01

Premiaziun dl foliet dl Istitut tecnich comerzial da Urtijëi da pert dla Ciamena di jornalisc a Roma

USP - La Ciamena di jornalisc nazionala a Roma ti à spôrt n gran lalt al Istitut tecnich comerzial „Raetia“ da Urtijëi por so foliet scolastich „Orange Juice“ metü adöm te na manira ejemplara. N valgügn scolars y insegnanc dl comitê de redaziun à podü pié do ai 24 de mà a Roma n pest da pert de Lorenzo Del Boca, presidënt dla Ciamena di jornalisc nazionala. Le foliet plajor y interessant tëgn ajornà plü iadi al ann la comunité scolastica, mo sambëgn ince i geniturs y d’ atri jogn sön tematiches che reverda la scora, le sport, proiec, tendënzes y en general argomënc por la jonëza.

Le grup de redaziun dl foliet „Orange Juice“ po zënzater ester contënt deache so foliet scolastich é un di mius 20 a livel nazional. Le foliet che contëgn articui te cin lingac, todësch, talian, ladin, inglesc y spagnol à albü n gran suzès pro la iuria dla Ćiamena nazionala di jornalisć pro le concurs „Fà n foliet a scora”. “Fajon n foliet a scora po les scolares y i scolars adorè i talënć plü desvalis y chësc ti dà al foliet na gran varieté“ à dit le presidënt dla Ćiamena di jornalisć Del Boca en gaujiun dla surandada di pesć. Giovanni Fuccio, le presidënt dl grup de laûr „Fà n foliet a scora“ à alzè fora che fà n foliet é na poscibilité por entusiasmè jënt jona a lì i folieć. L’insegnanta Rosalia Ongaro y l’insegnant Siegfried Steger à metü sö dan da trëi agn „Orange Juice“ adöm a n pice grup de scolares y scolars. Daimpröma ài sambëgn damanè consëis a jornalisć profescionisć. Śëgn vëgn fora le foliet cun le logo arance plü iadi al ann. Le grup de redaziun de chël ch’al po fà pert vigni scolar y vigni insegnant fej döt instës: cöie adöm les tematiches, mëte jö i articui, chirì y fà les fotografies, curè l’aspet grafich. Propi te na picia scora sciöche tl Istitut tecnich comerzial da Urtijëi n’èl nia dagnora saurì trà tres n te’ proiet, à dit l’insegnanta Ongaro. “Ma cun l’aiüt de dötes les insegnantes, de düć i insegnanć y dl diretur él stè tres indô poscibl dè fora chësc foliet“ à splighé Steger. “I laurun deboriada: scolars y insegnanć ...“; chësc é le moto a chël che la scora se tëgn bele dala pröma ediziun de „Orange Juice“ incà. Les scolares y i scolars scrî sura argomënć che i interessëia o mët jö articui por lascè aldì süa usc. Da scrì i articui ciafi sambëgn le sostëgn dles insegnantes y di insegnanć. Le pest por „Orange Juice“ ti fej inće dër plajëi al assessur Florian Mussner: “Ales scolares y ai scolars, ales insegnantes y ai insegnanć y dantadöt ai iniziadusc Ongaro und Steger che à laurè cotan te so tëmp lëde por le garatè dl foliet ti speta n gran reconescimënt”. Al é n resultat important propi deache na te’ picia scora é stada bona da realisé n foliet fat tan bëgn, à dit Mussner. “Chësta é na scomenciadia che inće les atres scores dess fà do deach’al vëgn alzè fora le carater plurilingh dla scora ladina” à dit l’assessur che inviëia les scolares y i scolars a adorè inant chësc foliet sciöche medium por lascè aldì süa usc.

USP

Galaria dales fotografies