Atualità
L assessëur Mussner sun l di mundiel per l svilup culturel, ai 21 de mei
USP - „L se ancunté y se giamië ora de cultures defrëntes ne comporta nia me risich, ma porta nce l’ucajion de se arichì l un cun l auter. La cundizion per arjonjer chësc ie l dialog danter la cultures, te chël che la singula cultura possa crëscer, restan davierta permez al’autra cultures.” Chësc ie l pensier dl assessëur ala scola y cultura ladina per ncuei sada 21 de mei, di mundiel per l svilup culturel numinà dal UNESCO. La cultura ladina, y dantaludt la rujeneda ladina dëssa unì cureda, ajache l ie la basa per la identità culturela de na mendranza, nscì Florian Mussner.
“Nce nëus Ladins dasson mantenì nosta cultura, te chëla che ti dajon lerch per l svilup y mantenimënt de nosta storia, nosc valores y nosta tradizions.” Chësc ne dëssa nia suzeder do portes stlutes. L barat danter nëus y cun la cultures ujines daujin y dalonc dëssa vester vif y atif,” dij Mussner. “La rujeneda de l’oma dëssa unì mantenida y purteda inant, ajache l ie la basa per la identità culturela de nosta pitla grupa de rujeneda”, sorissea Mussner. L prinzip dl unità y dla varietà che stluj nce ite l azetanza dla defrënzies, possa vester n bon pont per muever per i ladins tla valedes defrëntes, miena l Assessëur Ladin. “N fin mpurtant ie chël de purté inant truep proiec cun i Ladins de d’autra provinzies y de valorisé l mantenimënt de nosta rujeneda”, dij l assessëur. Nia sëuraudëi ne dëssen perchel de resté davierc permez a d’autra cultures y de resté tl dialog cun ëiles. Chësc cumporta nce n arichimënt per nosta cultura y n sustëni a fé crëscer inant nosta cultura. L assessëur culturel ladin nviëia duta la jënt a tenì pea tla vita culturela y tl dialog culturel.USP
