Atualità
Contribuc por investiziuns culturales dles uniuns ladines
USP - Les uniuns ladines che fej cultura ciafa n sostëgn finanziar da pert dla Provinzia. Dan da püch à la Junta provinziala resservè indöt 288.300 euro por investiziuns culturales dles uniuns ladines. La domanda ê gnüda fata dal assessur ladin Florian Mussner.
Bëgn 30 uniuns ladines po en chësc ann s’inconfortè al contribut dla Provinzia por sües investiziuns. Dan da püch à la Junta provinziala sön la basa de n bëgnsté dla Consulta por la cultura ladina resservè mesi finanziars por le grup linguistich ladin. „I contribuć é dër importanć por les uniuns ajach’ares adora pö n sostëgn por podëi se cumprè certes cosses d’importanza por süa ativité culturala” à dit l’assessur Mussner. N gran contribut de 100.000 euro ciafa la ploania da Urtijëi. Cun chisc scioldi ne déssel nia ma gnì finanzié laûrs pro dlijia mo bëgn inće la cumpra de orghi nüs. 50.000 euro mët la Provinzia a desposiziun por la trasformaziun dla scora elementara da Calfosch: chilò déssel gnì fat fora locai plurifunzionai y salfs dles uniuns. La soma de 50.000 euro ti va inće ala „Müjiga La Ila“ che é tl laûr de fà sö n local por les proes cun locai secundars. Na ligna de mëndri contribuć gnaràl inće dè a d'atres uniuns por cumprè trohtes, stromënć y aparać desvalis sciöche microfonns y material d’ofize.USP
