Atualità

Scora / Cultura | 06.05.2005 | 10:27

L’assessur Mussner incunta scolars y insegnanc dl Grijun

USP - En mercui, ai 4 de mà 2005, à l’assessur ladin Florian Mussner tut ite scolares y scolars, insegnantes y insegnanc da Coira tl Ciantun di Grijuns tl Istitut Pedagogich Ladin a Balsan. La delegaziun svizra à orü s’informè sura la cultura y le sistem scolastich dles valades ladines. Ti dis che vëgn gnaràl fat vijita a de plü localitês y istituziuns ladines.

Tl cheder de n iade cultural de cater dis tles valades ladines de Südtirol y dles provinzies vijines é 44 scolares y scolars cun dui insegnanć de na scora alta, che à sciöche lingaz d’insegnamënt le rumanc grijun, gnüs condüć tl Istitut Pedagogich Ladin a Balsan. L’assessur Mussner à saludé i ghesć svizri por ladin. “Al é de gran importanza che de te’ barać culturai vëgnes a s’al dè. Nostes raîsc storiches é tóch dlungia mo le svilup à indere portè a de plü desfarënzies” à dit l’assessur Mussner. Le contat ne dess nia ma gnì mantignì tres i massmedia – te Südtirol vëgnel pö inće ascutè le Radio Rumantsch – mo sambëgn dess inće les porsones s’incuntè tres indô y se baratè fora minunghes y esperiënzes, à sotrissé l’assessur Mussner. “Chëstes incuntades porta zënzater pro a renforzè nosta identité ladina y a svilupé n sentimënt de solidarieté cun nüsc vijins ladins dla Svizra” à dit Florian Mussner. Ultimamënter él gnü metü a jì de plü scomenciadies cun i retoromans dla Svizra. “I orun inće tl dagnì stabilì ćiamò d’atri contać y mëte a jì scomenciadies deboriada cun i ladins fora dla Provinzia de Balsan” à dit Mussner. Le barat cultural cun les scolares y i scolars dl Grijun é gnü a s’al dé tres la Repartiziun ladina dla faculté de Sciënzes dla formaziun da Porsenù. Le professur Werner Carieget che tëgn bele da de plü agn leziuns por la seziun ladina tl’Université da Porsenù y che à colaurè a proieć desvalis sön l’imparè di lingac te n ambiënt plurilingh, à organisé chësta incuntada adöm cun le diretur dl Istitut Pedagogich Ladin Theodor Rifesser. Ti dis che vëgn jarà la delegaziun svizra tl’Université da Porsenù, tl Istitut Ladin Micurà de Rü y tl Museum Ladin Ćiastel de Tor a San Martin. Implü fajarà les scolares y i scolars na vijita te de plü localitês ladines incër le Sela. Bele denant co rové te Südtirol à les scolares y i scolars dla Svizra menè na ligna de domandes a Theodor Rifesser; chësc é sambëgn n sëgn de gran interès por Südtirol.

USP

Galaria dales fotografies